Belgjika po kalon momente të vështira në Botërorin 2026, pasi pas dy ndeshjeve të para ende nuk ka arritur të shijojë fitoren. Pas barazimit 1-1 ndaj Egjiptit, “Djajtë e Kuq” u ndalën në një tjetër barazim, këtë herë 0-0 ndaj Iranit, duke komplikuar ndjeshëm situatën në Grupin G.

Sulmuesi kryesor i belgëve, Romelu Lukaku, pranoi se skuadra e tij duhet të tregojë më shumë qetësi në momentet vendimtare.

“Duhet të kontrollojmë emocionet, të qëndrojmë të qetë dhe të ruajmë gjakftohtësinë. Mendoj se kjo është diçka që duhet ta përmirësojmë dhe lojtarët e dinë këtë”, deklaroi Lukaku pas ndeshjes.

Belgjika dominoi përballjen ndaj Iranit, duke mbajtur afro 70 për qind të zotërimit të topit dhe duke regjistruar 23 goditje drejt portës, por pa arritur të mposhtte portierin heroik të iranianëve, Alireza Beiranvand.

Edhe trajneri i Belgjikës, Rudi Garcia, u shpreh i zhgënjyer me mungesën e efikasitetit të skuadrës së tij.

“Lojën e kontrolluam ashtu siç kishim planifikuar. Irani pritej të na godiste me kundërsulme dhe goditje standarde, por ne nuk ishim mjaftueshëm të saktë para portës. Nëse nuk shënon, nuk mund ta fitosh ndeshjen”, tha Garcia.

Situata u vështirësua edhe më shumë pas kartonit të kuq të Nathan Ngoy, që la Belgjikën me dhjetë lojtarë për gjysmë ore. Megjithatë, fokusi kryesor mbetet te rastet e shumta të humbura.

Tani gjithçka do të vendoset në ndeshjen e fundit të grupit ndaj New Zealand.

Belgjikës i duhet patjetër fitorja për ta mbajtur fatin në duart e veta dhe për të shmangur një eliminim të parakohshëm nga Botërori.

“Është Kupa e Botës, turneu më i madh në futboll. Ne nuk duam të kthehemi në shtëpi. Duam të shkojmë sa më larg dhe do të japim gjithçka për ta arritur këtë”, përfundoi Lukaku.