Nga Ardi Puka
. . . pyetja bazë nuk ishte: dinin apo nuk dinin. Por a është dikush i pafajshëm, sepse nuk di? Një idiot i ulur mbi fron a është i shkarkuar nga çdo përgjegjësi vetëm nga fakti se është idiot? (M. Kundera)
Babëzia është si një enë pa fund që nuk mbushet kurrë. (E. Fromm)
Sa të gabueshëm dhe të paditur lejohet të jenë politikanët në pushtet kur bëhet fjalë për vendime për jetën dhe vdekjen e qytetarëve të tyre, por edhe të atyre që jetojnë në vendet fqinje? Dhe cilat janë pasojat me të cilat kokat e qeverive të zgjedhura në mënyrë demokratike ose autokratike duhet të përballen nëse ata janë përgjegjës për vdekjen e shmangshme të dhjetëra mijëra njerëzve përmes veprimeve ose indiferencës së tyre?
Pas luftërave (edhe civile) të humbura, të nxitura dhe të zgjatura me të vdekur të panumërt, të plagosur, të zhvendosur dhe të mbijetuar të traumatizuar, fillimi dhe fundi i të cilave janë në duart e qeverive dhe të atyre në pushtet, historia mban ndëshkim gati, me zgjedhjet, rrëzimin dhe dënimin e atyre që janë përgjegjës politikisht. Shembulli më i famshëm janë Gjyqet e Nurembergut.
Por në rastin e pandemisë që preku të gjithë botën, aktualisht nuk ka ndonjë autoritet ndërkombëtar para të cilit politikanët përgjegjës për mbrojtjen e shëndetit të qytetarëve të tyre do duhej të përgjigjeshin. Eshtë e vështirë të imagjinohet që Kombet e Bashkuara ose një gjykatë kriminale do ta mbajnë përgjegjësinë e superfuqisë agresive Kinë dhe udhëheqjen e saj, edhe pse ajo solli shumë mjerim për njerëzimin gjatë javëve të saj të manovrave të mbulimit kur shpërtheu pandemia Covid-19.
Por në Shqipëri ka edhe lajme të mira, madje shumë të mira. Lajmi më i mire i fillim vitit të shkuar ishte shpallja e Vjosës dhe tributarëve të tij si Park Kombëtar. Për sqarim në gjeografinë fizike me tributar quajme të gjithë trupat ujorë, lumenj të vegjël, përrenj që pastaj derdhen në një lum kryesor apo në një liqen. Një nga dy tributarët kryesorë të Vjosës është lumi i Shushicës, për të cilinsërish po flitet dhe për të cilin banorët kanë shqetësimin se po u tjetërsohet.
Meritën kryesore në shpalljen e Vjosës Park Kombëtar (nga zhurma, nga bukuria dhe nga vlerat Vjosa tashmë eshtë e famshme) e kanë banoret, intelektualë vendas dhe të huaj, shoqatat mjedisore, sipërmarrja Patagonia, aktori Di Caprio dhe Këshilli i Evropës. Kryeministri i Shqipërisë ka meritën që gërvishti firmën dhe nuk se dukej i kënaqur, përkundrazi përfitoi nga rasti në ditën e gëzueshme të firmosjes, që të mos ia përmendin dhe mos e shqetësojnë më për projektin e shumëpërfolur të ndërtimit të aeroportit të Vlorës (edhe ai në një zonë të mbrojtur). Por ai (Kryeministri) gjithashtu deklaron që shpallja e Vjosës PK ka përmirësuar imazhin e vendit dhe se qeverisja është e vetëdijshme për mbrojtjen e mjedisit dhe ndryshimet klimatike. Ky ishte një lajm akoma edhe më i mirë se i pari, sepse deri para do muajsh nuk ndodhte kështu.
Një zyrtari i lartë (specialist mjedisi) i Ministrisë së Mjedisit, që përfaqësonte Ministrinë në daljet publike apo takimet me aktivistët dhe intelektualë të huaj, e shpallte rrjedhën e poshtme dhe të mesme të Vjosës krejt pa vlerë, asgjë vec rërë dhe zhavor ! ! Aty do të ndërtoheshin mbi 250 HEC-e ! ! ! Krejt e kundërta sipas shkencëtarëvë të huaj që mbërritën nga Gjermania dhe Austria: aty u gjetën lloje dhe specie që nuk njiheshin më parë, peisazhi është unik, banorët e kërcënuar e të nëpërkëmbur i kundërshtojnëprojektet.
Mediat e huaja, intelektuale, aktiviste, sipërmarrje të huaja dhe grupe interesi vendase kane ngritur zërin dhe luftuan prej 10 vjetësh kundër digave dhe HEC-eve. Psh në artikujt e gjatë të së përmuajshmes “natur“ 10/2019 me titull “Shpëtoni zemrën blu”, fjala korrupsion zinte një vend kryesor: - një nga nëntitujt ishte - “Je grosser der Projekt, desto mehr Geld kann verschwinden” (“Sa më i madh projekti aq më shumë pare mund të zhduken”)
Meqenësë vendi ynë është kandidat për BE, i duhet të përafrojë ligjet, normat, regulloret me ato evropiane. Psh duhet që paraçdo projekti, sado i vogel apo i parëndësishën në dukje, ti nënshtrohet pararaprakisht një vlerësimi tëndikimeve të mundshme në mjedis; edhe komunitetet që preken direkt apo edhe jodirekt nga projekti duhet të informohen, të pyeten dhe të japin pëlqimin e tyre ose jo. Banorët e fshatit Kut në buzë të Vjosës dhe ambientalistët paditën projektin dhe firmën në Gjykatë. Dhe këtu shfaqet korrupsioni dhe babëzia. Mes të tjerash doli se Raporti i VNM (vlerësim ndikimi në mjedis) për HEC- Poçem ishtë fallco, 60% ishte copy -paste i dikujt tjetër, kishte emra vendesh që nuk kanë lidhje me rajonin e Vjosës,në detyrimin për pjesëmarrjen me publikun, në vend të banorëve ishin firma punonjësish bashkiakw që jetonin 2 orë larg me makinë ! !
E megjithatë pushtetarët e kishin pranur raportin si të rregullt dhe krejt OK.
Shumëkush mund të pyesë se përse ngulin këmbë kaq fort qeveritarët dhe oborri që të ngrenë diga dhe HEC-e ngado nëpër lumenj (së fundmi edhe në Shushicë)?Kjo ka çuar nënjë situatë groteske,kujanë ndërtuar hidrocentrale në zona të tjera të Shqipërisë, lumenjtë e të cilëve praktikisht nuk kanë ujë për dhjetë muaj të vitit. Mediat e huaja (dhe jo vetëm) e dinë përgjigjen: revista “natur” dt 10/2019 shkruan - "Planifikuesit shpërblehen sepse ata devijojnë një përqindje të lartë të të gjithë projektit për veten e tyre. Natyra dhe banorët e rajonit humbasin. Për shkak se pushtetarët në Shqipëri nuk janë të gatshëm të formojnë të ardhmen së bashku me mbrojtësit e natyrës, ata e kanë të vështirë të vënë në dukje alternativat e tyre. Shqipëria nuk mund të plotësojë nevojat e veta për energji. Energjinë elektrike e prodhon deri më tani 90% me hidrocentrale, 10% e importon nga Serbia. Por ka potencial të madh për energjinë e erës dhe diellit. Praktikisht asgjë nuk është bërë në këtë drejtim deri më tani”
Riverwatch dhe EuroNatur kishin hartuar një studim dhe prezantuan alternativa që ishin në përputhje me natyrën: Shqipëria ishte në gjendje të prodhonte 15.6 terrawatorë energji elektrike nga era/panelet solare në vit me të njëjtin kosto si aktualisht me hidrocentralet - që është dy herë më shumë energji elektrike sesa është e nevojshme sot. Nëse keni parasysh gjithashtu se në Greqi, Spanjë dhe Italinë Jugore një kilowatorë energji diellore tani mund të prodhohet për më pak se 3 cent, në Afrikën e Veriut edhe për më pak se 1 cent, njeriu pyet veten pse kjo nuk duhet të jetë e mundur në Shqipëri.? Përgjigja për këtë pyetje është sërish korrupsioni. "Një hidrocentral është një objekt shumë kompleks, thotë U. Eichelmann(Euronatur). Duhet të ndërtohen rrugë dhe të vendosen tubacione, dhe shpeshherë nevojiten tunele. Uji duhet të devijohet gjatë fazës së ndërtimit, aty është diga dhe më pas termocentrali aktual me turbinat e tij. Është e lehtë të vendosësh çmime shumë më të larta se sa duhen për ndërtimin aktual. Ndryshimi më pas shkon tek ndërtuesit e termocentraleve dhe për fat të keq shpeshherë edhe tek politikanët që japin miratimin.Turbinat me erë apo parqet diellore, nga ana tjetër, janë investime relativisht të menaxhueshme me objekte shumë të thjeshta. Ata që janë përfshirë kanë pak liri veprimi për të fshehur fondet - dhe për këtë arsye pak interes për alternativat e bazuara në parimet natyrore”
Unëpersonalisht jam specialist i licensuar në vlerësimet e ndikimeve mjedisore nga projektet dhe e di se raportet e VNM janë janë thjesht letra me ngjyra, sa për sy e faqe, për të qenë në rregull me dosjen dhe legjislacionin dhe që autoritet nuk i lexojnë aspak. Autoritetet nuk I kuptojne raportet, nuk ju pelqejnë, janë të bezdisshme dhe dikujt mund t’i hapin probleme. Një Kryeministër shqiptar (në lidhje të shkurtër me dikë që ka euro ose lekë për të investuar/pastruar) beson se e ka të lehtë të firmosë për burimet dhe pasuritë natyrore të vendit, po aq thjesht dhe fare lehtë, pothuaj sikur t’ia ketë lënë trashëgim ndonje familjar. Vjosa dhe Shushica kane qenë aty para nesh, janë aty dhe do të duhet të jenë mundësisht ashtu siç i ka krijuar Zoti dhe/ose Natyra. Ata burojnë, rrjedhin dhe derdhen ne det prej qindra, mijëra, miliona vjetësh, para se të lindnin gabimisht investitorët dhe Kryeministri i Shqipërisë.
Nje mesazhi i këtij artikulli është edhe që mundësisht të kuptohet se procedurat e Vlerësimit të Ndikimit në Mjedis (VNM), duhet të bëhen sa më shpejtë të zbatueshme në mënyrën më të drejtë dhe më fitimprurëse, në se duam që projektet të kenë sukses. Nëse ato do të jenë të gabuara, mund të bëhen pengesë për zhvillime ekonomike, mund të çojë në dhunimin e detyrimeve të rëndësishme mjedisore apo të drejtave të njeriut (si në rastin flagrant me lumin dhe projektet në Vjosë).
Urb. Ardi Puka
© SYRI.net