Disqe safiri të skalitur me "esencën e njerëzimit" do të dërgohen në Hënë nën programin Artemis të NASA-s për të vepruar si një depo e njohurive njerëzore.

Projekti, i titulluar Sanctuary On The Moon, përfshin shembuj të matematikës, kulturës, paleontologjisë, artit dhe shkencës, si dhe gjenomet njerëzore të një burri dhe një gruaje.

Disqet imitojnë fonografët e artë të dërguar me anijen kozmike Voyager, anijet e para që u larguan nga Sistemi Diellor, të cilat përmbanin përshëndetje në 55 gjuhë të ndryshme, mesazhe nga liderët botërorë dhe madje edhe një rrahje zemre njerëzore.

Disqet e reja përfshijnë skema për raketën Saturn V të NASA-s dhe modulet e uljes hënore që çuan astronautët në Hënë në misionin Apollo, si dhe piktura nga Leonardo da Vinci dhe Vincent van Gogh, dhe Deklarata e të Drejtave të Njeriut.

Ekzistojnë gjithashtu harta qiellore dhe tokësore, si dhe të dhëna për anatominë, astrofizikën dhe fizikën e grimcave, fazat e Hënës dhe zhvillime si motori me djegie dhe makinat fluturuese.

"Kemi kënaqësinë ta çojmë Sanctuary-n në Hënë," tha Joel Kearns, zëvendësadministrator i NASA-s për eksplorimin në Drejtorinë e Misionit Shkencës të agjencisë.

"Ne besojmë se kjo depo e njohurive e kuruar ndërkombëtarisht në Hënë do të shërbejë si frymëzim sot dhe për shumë breza që do të vijnë."

Disqet janë ideja e Benoit Faiveley, një inxhinier francez i cili ka punuar me një ekip shkencëtarësh, studiuesish, stilistësh dhe artistësh ndërkombëtarë për të zgjedhur se çfarë imazhesh do të vendosin në çdo disk.

Vetë zoti Faiveley shfaqet në një nga disqet i veshur me një kostum astronauti.

Disqet, të cilat do të vendosen në një kapsulë alumini të qëndrueshme, do të çohen në sipërfaqen e Hënës duke përdorur një sondë hapësinore automatike sipas kontratës Commercial Lunar Payload Services me NASA-n.

Zoti Faiveley tha: "E vetmja gjë që ka mbetur nga kulturat e lashta janë objektet e prekshme, hieroglifet, gurët, shkrimet, pikturat që kanë zgjatur gjatë shekujve dhe mijëvjeçarëve.

"Pra, ne morëm një rrugë të ngjashme. Do të jetë një portret i larmishëm i specieve tona, i gdhendur në mikropikselë. Ka shembuj të rëndësishëm nga astrofizika, fizika e grimcave, astronomia dhe shkenca planetare. Shpresojmë që Sanctuary të përbëjë një 'përshëndetje kozmike' për pasardhësit tanë apo ndoshta edhe vizitorët nga gjetkë. Projekti Sanctuary është një mesazh për një afat shumë të gjatë. Ne duam që eksploruesit e ardhshëm të kthehen në kohë e të bashkohen me ne në eksplorimin tonë të vetvetes, botës dhe epokës sonë."

Do të ketë gjithsej 24 disqe, me një piksel për çdo Homo sapiens që ka jetuar në planet. Përveç hapësirës, tema të tjera do të përfshijnë jetën biologjinë, kohën e moshën dhe materien e atomet.

Gjenomet mashkullore dhe femërore të renditura në Qendrën e Shkencave të Gjenomit në British Columbia në Vankuver do të vendosen në dy disqe të veçantë.

24 disqet aktualisht janë duke u përgatitur në Komisionin Francez të Energjive Alternative dhe Energjisë Atomike.

Adama Pam, kryearkivist në UNESCO, i cili ka mbështetur projektin, tha: "Ne gjithmonë kemi mbështetur ide të reja dhe ambicioze. Sanctuary on the Moon rezonon me angazhimin e vazhdueshëm të UNESCO-s për arsimin, shkencën dhe kulturën, dhe misionin tonë për të ndarë njohuritë tona për arritjet intelektuale dhe morale të njerëzimit."/The Telegraph - Syri.net