Në vitin 1953, artistja franceze Françoise Gilot e la Pablo Picasso-n, partnerin e saj prej 10 vitesh, babanë e dy fëmijëve të saj dhe titanin e botës së artit europian.

Për ta bërë këtë duhej guxim: Sipas vetë Gilot-it, Picasso - një burrë kapriçioz që ishte martuar dy herë dhe kishte një seri marrëdhëniesh afatgjata dhe lidhjesh jashtëmartesore - u përpoq të sabotonte karrierën e saj artistike, duke i thënë: "Një njeri si unë nuk mund të lihet."

Por Gilot e bëri gjithsesi - dhe mendohet të jetë e vetmja nga partneret e tij që e ka lënë. Më vonë ajo shkroi një libër për jetën e tyre bashkë, të cilin Picasso u përpoq disa herë ta anulonte.

Për shkak të zemërimit të Picasso-s ndaj saj dhe për shkak se ajo u transferua më vonë në Shtetet e Bashkuara, vepra e Gilot-it ka pasur "një prani shumë të kufizuar në koleksionet publike franceze", tha Joanne Snrech, kuratore e pikturave në Muzeun e Picasso-s në Paris.

Siç raportoi më parë The Washington Post, Gilot u takua me Picasso-n në një bistro pariziene në vitin 1943. Ai ishte 40 vjet më i madh se ajo dhe tashmë kishte arritur famë artistike. Ajo ishte një piktore 21-vjeçare që sapo kishte lënë shtëpinë e prindërve të saj dhe ishte "magjepsur" prej tij, do të thoshte më vonë për revistën Paris Match.

Në fillim, ajo mbajti distancë nga Picasso: Ai ishte "invaziv dhe dominues" dhe ajo e vlerësonte "lirinë" e saj, tha ajo për Paris Match. Por në fund, dyshja krijoi një lidhje që do të zgjaste rreth një dekadë. Ata patën dy fëmijë: Claude-in, i cili vdiq vitin e kaluar, dhe Palomën.

Por marrëdhënia e Gilot-it dhe Picasso-s ishte e trazuar dhe Gilot ka përshkruar se si ajo përpiqej ta ngrinte piktorin nga shtrati në mëngjes, kur ai ishte në humor melankolik. "Isha e lumtur me të vetëm për tre vitet e para, kur nuk jetonim bashkë", tha Gilot për Paris Match.

Në vitin 1953, Gilot e la Picasso-n dhe u transferua në Paris dhe më pas në Shtetet e Bashkuara. "Nuk ishte më e përshtashme ... për fëmijët e mi dhe as për mua," tha ajo për Paris Match. Pasi Picasso mbushi 70 vjeç, "rinia ime u bë e padurueshme për të. Ai ishte agresiv dhe i pakëndshëm," kujton ajo. "Edhe unë kisha ndryshuar. Nuk isha më pajtuesja e matur që kisha qenë dikur."

Siç raportoi The Post, Gilot tha se Picasso u përpoq të hakmerrej duke sabotuar karrierën e saj artistike, duke bindur disa galeri që të mos ekspozojnë ose shesin pikturat e saj. Në një intervistë me Charlie Rose në vitin 2012, Gilot tha se Picasso "kishte një anë shumë sadiste", megjithëse ajo tha, "ai nuk u përpoq të më shkatërronte".

Ajo tha për Paris Match, se ajo "iu kthye pikturës, plot ndrojtje, duke zgjedhur një minimalizëm që ishte e kundërta e stilit të tij".

Gilot vazhdoi të ketë një karrierë të shquar si piktore në Shtetet e Bashkuara, me punën e saj që u shfaq në Muzeun Metropolitan të Artit dhe Muzeun e Artit Modern.

Puna e Gilot-it përfshin formate dhe disiplina të ndryshme artistike, dhe megjithëse stili i saj evoluoi disa herë, ajo zhvilloi një dashuri për ngjyrën, të cilën e përdori me bollëk në punën e saj. Ajo ishte e interesuar për mitologjinë greke dhe mendoi thellë "për mënyrën se si ajo pikturon, pse e bën atë dhe si e bën atë," tha Snrech. "Ishte në intelektuale e vërtetë."

Në vitin 1964, Gilot botoi "Life With Picasso", një kujtim i bashkëshkruar me kritikun amerikan të artit Carlton Lake. Picasso ngriti tri herë padi për të bllokuar daljen librit. Përpjekjet e tij dështuan dhe libri ishte një sukses komercial, por kjo do të thoshte se Gilot "u braktis dhe u ndalua nga mjedisi artistik dhe kulturor francez", tha Snrech. Ajo shpreson se hapja, 60 vjet më vonë, e një dhome brenda Muzeut së Picasso-s kushtuar Gilot-it, artistes, do të ndihmojë në ndryshimin e kësaj.

Megjithëse planifikimi për dhomën në koleksion filloi para vdekjes së Gilot-it, artistja nuk u përfshi sepse ishte në gjendje të keqe shëndetësore. Muzeu i Picasso-s punoi me dy nga fëmijët e Gilot-it për ta realizuar këtë gjë, tha Snrech.

Por pikturat, të cilat janë huazuar nga koleksionistët privatë, në fund do të duhet të kthehen dhe dhoma ka të ngjarë të zëvendësohet nga një tjetër. Muzeu nuk zotëron asnjë nga veprat e Gilot-it.