Ylli i Bayern Munichut dhe i kombëtares së Francës, Michael Olise, është përfshirë në një çështje personale që ka marrë jehonë në rrjetet sociale.

Një grua, e cila pretendon se është nëna e vajzës së tij, e ka akuzuar publikisht futbollistin se nuk po përmbush detyrimet financiare ndaj fëmijës.

Sipas saj, Olise nuk ka kontribuar në mbështetjen ekonomike të vajzës dhe madje e ka bllokuar në rrjetet sociale.

Për të mbështetur pretendimet e saj, ajo ka publikuar dokumente dhe mesazhe, duke e kthyer rastin në një temë të diskutuar gjerësisht në internet.

Nga ana tjetër, kampi i futbollistit i ka hedhur poshtë akuzat. Sipas përfaqësuesve të tij, çështja është duke u trajtuar përmes rrugëve ligjore dhe procedurat janë respektuar, ndërsa deklaratat e bëra publikisht nuk pasqyrojnë të gjithë situatën.

Për këtë arsye, Olise ka vendosur të mos japë deklarata të tjera derisa procesi ligjor të përfundojë.

Aktualisht nuk ekziston një vendim përfundimtar gjyqësor dhe rasti mbetet një mosmarrëveshje civile mes dy palëve, të cilat vazhdojnë të mbrojnë versione të ndryshme të ngjarjes.