Nga Luke Augustus, DAILY MAIL

Frika për favorizim të Argjentinës në Kupën e Botës është shtuar pasi FIFA konfirmoi se arbitri i preferuar i Lionel Messit do të gjykojë gjysmëfinalen e shumëpritur të Anglisë kundër kampionëve në fuqi.

Skuadra e Messit ka qenë larg formës së saj më të mirë përpara përballjes së së mërkurës me "Tre Luanët", pasi kaloi me shumë vështirësi Egjiptin dhe Zvicrën në mënyrë kontroverse në fazën e 1/8-ave dhe çerekfinale, respektivisht.

Mënyra se si u arritën këto fitore – ku Egjiptit iu anulua në mënyrë të diskutueshme një gol, ndërsa Zvicra pa sulmuesin Breel Embolo të ndëshkohej me karton të kuq – shkaktoi reagime të mëdha dhe spekulime se FIFA po komploton për të ndihmuar Messin dhe Argjentinën të fitojnë turneun, një akuzë që organi qeverisës e mohon me forcë.

Dhe të martën u konfirmua se Ismail Elfath do të jetë arbitri kryesor – në atë që do të jetë ndeshja më prestigjioze e karrierës së tij si gjyqtar – në Atlanta Stadium të mërkurën, teksa Anglia synon të arrijë finalen e saj të parë të Kupës së Botës që nga viti 1966, ndërsa Argjentina kërkon të sigurojë një finale të dytë radhazi.

Amerikani me origjinë marokene, i cili do të asistohet nga bashkatdhetarët Corey Parker dhe Kyle Atkins, do të drejtojë ndeshjen e tij të katërt në këtë Kupë Bote – dhe për herë të parë këtë verë do të gjykojë një takim ku luan Anglia ose Argjentina. Arbitri i katërt do të jetë italiani Maurizio Mariani.

Elfath ishte arbitri i katërt në Katar kur Argjentina mposhti Francën për të fituar Kupën e Botës 2022, dhe kontaktet e tij me Messin janë shtuar që kur sulmuesi iu bashkua skuadrës së MLS-së, Inter Miami, në korrik 2023.

Një muaj pasi nënshkroi me Inter Miami, Messi ndihmoi ekipin e tij të ri të fitonte finalen e Leagues Cup ndaj Nashville SC, një ndeshje që u gjykua pikërisht nga Elfath.

Messi shënoi golin e parë me një goditje të fuqishme në këndin e sipërm nga jashtë zonës, përpara se Nashville të barazonte. Ndeshja më pas shkoi te penalltitë, ku Miami fitoi 10-9, ndërsa Messi realizoi penalltinë e parë të ekipit të tij.

Në fakt, që prej ardhjes së tij në Shtetet e Bashkuara, Messi është gjykuar katër herë nga Elfath – dhe ka fituar në të katër rastet.

Përveç finales së lartpërmendur të Leagues Cup, Messi ka shënuar edhe katër gola në tre ndeshjet e tjera të MLS-së që janë gjykuar nga Elfath.

Dhe futbollistët e Anglisë duhet të bëjnë kujdes, pasi statistikat e Elfath në MLS këtë sezon tregojnë se ai nuk ngurron ta nxjerrë bllokun e kartonëve.

Në 10 ndeshjet që ka gjykuar, përpara se sezoni të ndërpritej për Kupën e Botës, ai ka dhënë 41 kartonë të verdhë, ka përjashtuar tre lojtarë me karton të kuq dhe ka akorduar tre penallti.

Kjo qasje është reflektuar edhe në këtë Kupë Bote deri tani, ku ai ka dhënë tetë kartonë të verdhë dhe një karton të kuq në tre ndeshje – Holandë 2-2 Japoni, Spanjë 1-0 Uruguai dhe Norvegji 2-1 Brazil.

Edhe ndeshja Spanjë–Uruguai u shoqërua me polemika, pasi arbitri 44-vjeçar u vu në shënjestër të mediave spanjolle për paraqitjen e tij.

Ai u akuzua se nuk ishte mjaftueshëm i ashpër ndaj lojtarëve uruguaianë, ndërsa ndeshja u bë gjithnjë e më e tensionuar.

Në minutat e fundit të kohës shtesë të pjesës së dytë, mesfushori uruguaian Agustin Canobbio u përjashtua me karton të kuq për një ndërhyrje të rrezikshme ndaj Pau Cubarsi.

Megjithatë, ankesa më e madhe e mediave spanjolle lidhej me ndërhyrjen e Nicolas De La Cruz ndaj Nico Williams, e cila e la këtë të fundit të dëmtuar.

Williams e përshkroi atë si "një nga ditët më të këqija të jetës sime" pas ndeshjes, por gjithsesi luajti minutat e fundit të fitores së Spanjës në çerekfinale ndaj Portugalisë.

Edhe ndeshja më e fundit e Elfath pati një moment kontrovers, kur ai fillimisht hodhi poshtë kërkesat e Brazilit për penallti pasi mbrojtësi norvegjez Kristoffer Ajer ndërhyri ndaj Matheus Cunha.

Megjithatë, VAR-i ndërhyri dhe Elfath ndryshoi vendimin e tij, përpara se Bruno Guimaraes ta humbiste penalltinë, pasi goditja e tij u prit nga portieri.

Messi dhe Argjentina janë përballur me vëmendje të madhe gjatë gjithë kësaj Kupe Bote, mes akuzave se arbitrat po i favorizojnë.

Incidenti më i fundit ndodhi të shtunën, kur mbrojtësi zviceran Manuel Akanji deklaroi se "çdo gjë ishte kundër nesh" pas humbjes 3-1 ndaj Argjentinës në çerekfinale pas kohës shtesë.

Lojtarët dhe trajneri i Zvicrës u zemëruan pasi Breel Embolo u bë lojtari i parë që u përjashtua si pasojë e një rregulli të ri për identitet të gabuar.

Kur çerekfinalja ishte në barazim në minutën e 72-të, Embolo mori kartonin e dytë të verdhë pas një rishikimi nga arbitri video (VAR), i cili vendosi se ai kishte simuluar, dhe jo se ishte faulluar nga argjentinasi Leandro Paredes.

Një rregull i ri, i futur për këtë Kupë Bote, parashikon që nëse një lojtar ndëshkohet me karton të verdhë ose të kuq, por më pas rezulton se faulli është kryer nga kundërshtari, vendimi mund të ndryshohet.

Duke folur pas ndeshjes, Akanji shpërtheu: "Çdo vendim i vogël u mor kundër nesh" dhe "Nuk kam përjetuar kurrë një ndeshje kaq të njëanshme."

Trajneri Murat Yakin e quajti gjykimin "të pakuptueshëm".

Javën e kaluar, shefi i arbitrave të FIFA-s, Pierluigi Collina, kritikoi ashpër ata që vënë në dyshim integritetin e arbitrave të Kupës së Botës, duke këmbëngulur se ata nuk mund të ndikohen nga askush, pas ankesave të Egjiptit për humbjen në fazën e 1/8-ave ndaj Argjentinës.

Kampionët në fuqi u rikthyen nga disavantazhi 2-0 pas minutës së 78-të për të fituar 3-2 në Atlanta, ndërsa trajneri i Egjiptit, Hossam Hassan, më pas akuzoi FIFA-n se po manipulonte Kupën e Botës në favor të yllit të Argjentinës, Lionel Messi.

Pretendimet e Hassan u përforcuan edhe nga pamjet ku ai shihej duke pritur me zemërim në tunel për t'u përballur me lojtarët e Argjentinës pas fishkëllimës së fundit.

Duke iu përgjigjur kritikave ndaj arbitrimit, Collina i hodhi poshtë akuzat ndaj stafit të tij dhe theksoi pasojat më të gjera që ato kanë për personat e akuzuar.

I pyetur nga FIFA.com se si e vlerëson deri tani Kupën e Botës, shefi i arbitrimit të FIFA-s tha:

"Le ta nisim duke thënë se kemi zhvilluar tashmë 50 për qind më shumë ndeshje sesa në Kupën e Botës 'Katar 2022', dhe ende kanë mbetur edhe tetë ndeshje shumë të mëdha për t'u luajtur. Në përgjithësi, jemi të kënaqur. Megjithatë, kur zhvillohet një numër kaq i madh ndeshjesh në një periudhë relativisht të shkurtër, është normale që disa gjëra të mos shkojnë siç pritet. Kur ndodh kjo, arbitrat janë të gatshëm të punojnë edhe më fort për t'u siguruar që janë plotësisht të përgatitur për ndeshjen e radhës. Natyrisht, diskutimi konstruktiv për vendimet do të jetë gjithmonë pjesë e futbollit, por akuzat e pabazuara nuk kanë vend në sportin tonë. Askush nuk mund ta vërë në dyshim integritetin e arbitrave të ndeshjeve të Kupës së Botës. Kur ndodh kjo, mund të provokojë reagime që çojnë në kërcënime ndaj tyre dhe familjeve të tyre. Kjo nuk është e drejtë. Po ashtu, askush nuk mund të pretendojë se arbitrimi i FIFA-s mund të ndikohet nga dikush, madje as nga presidenti i FIFA-s, Gianni Infantino. Ai gjithmonë ka treguar mbështetje të plotë për ekipin e arbitrave të FIFA-s, duke na besuar të punojmë me pavarësi të plotë. Arbitrat marrin vendime të ndershme dhe, ashtu si lojtarët dhe trajnerët, gjithmonë përpiqen të japin maksimumin."