Kush është Ismail Elfath, arbitri që do të drejtojë gjysmëfinalen Angli - Argjentinë

Ismail Elfath është arbitri i përzgjedhur për të drejtuar një nga ndeshjet më të mëdha të Botërorit 2026, gjysmëfinalen mes Anglisë dhe Argjentinës në Atlanta.

Elfath ka lindur në Marok, por karrierën e tij si gjyqtar e ka ndërtuar në Shtetet e Bashkuara të Amerikës. Ai u transferua në SHBA kur ishte vetëm 18 vjeç, pasi fitoi një vizë përmes lotarisë së diversitetit. Në vitin 2006 u diplomua në Universitetin e Teksasit për inxhinieri mekanike.

Karrierën si arbitër e nisi në kampionatin amerikan Major League Soccer (MLS) në vitin 2012, ndërsa në vitin 2016 u përfshi në listën e gjyqtarëve të FIFA-s. Tre vjet më vonë, ai u përzgjodh për të drejtuar ndeshje në Kupën e Botës U-20.

Në vitin 2022 bëri debutimin në një Botëror për të rritur, ku drejtoi tri ndeshje në turneun e Katarit, përfshirë edhe përballjen e fazës së 1/8-ave mes Japonisë dhe Kroacisë.

Kjo gjysmëfinale mes Anglisë dhe Argjentinës do të jetë ndeshja e tij e katërt në Botërorin 2026. Gjyqtari 44-vjeçar ka drejtuar më herët sfidën mes Spanjës dhe Uruguait në fazën e grupeve, ku ndëshkoi me karton të kuq Agustín Cannobio. Ai ishte gjithashtu arbitër në fitoren e Norvegjisë ndaj Brazilit në fazën e 1/8-ave.

Anglia dhe Argjentina nuk janë përballur që prej një miqësoreje të zhvilluar në Gjenevë në vitin 2005. Dueli i fundit mes tyre në një Botëror ishte në vitin 1998, në fazën e 1/8-ave, ku Argjentina triumfoi pas gjuajtjeve të penalltive.

Elfath tashmë përballet me një nga sfidat më të mëdha të karrierës së tij, pasi do të jetë përgjegjës për drejtësinë në një duel historik mes dy prej kombëtareve më të mëdha të futbollit botëror.

Trupa e arbitrimit për Angli – Argjentinë:

Arbitër kryesor: Ismail Elfath (SHBA)

Asistentë: Corey Parker dhe Kyle Atkins (SHBA)

Arbitër i katërt: Maurizio Mariani (Itali)