‘Turi i Francës’: 10 ‘majat’ që Spanja duhet të kalojë për të eliminuar ‘Gjelat’

Rruga drejt finales së Botërorit 2026 nuk kalon thjesht përmes një ndeshjeje futbolli, por ngjan me ngjitjen e etapave më të vështira të ‘Tour de France’. Për të eliminuar Francën, Spanja duhet të përballojë dhjetë “male”, secili me vështirësitë e veta. Në fund të rrugës e pret pengesa më e madhe: Kylian Mbappe.

Etapa 1 – Sulmi nga krahët

Në letër, pika më e dobët e Francës janë mbrojtësit e krahut. Digne ka hasur vështirësi në duelet një kundër një, ndërsa Jules Koundé do të ketë përballë Lamine Yamal. Nëse Yamal dhe Nico Williams arrijnë t’i detyrojnë mbrojtësit francezë të luajnë pranë zonës së tyre, Spanja mund të krijojë avantazhin e parë.

Etapa 2 – Dominimi i topit

Franca nuk e ka problem të luajë pa top, por nuk ndihet rehat kur detyrohet të vrapojë gjatë pas tij. Spanja, skuadra me përqindjen më të lartë të posedimit në këtë Botëror (rreth 60%), do të përpiqet të kontrollojë lojën me Pedrin, Rodrin, Fabian Ruizin dhe Dani Olmon, duke e mbajtur topin larg francezëve.

Etapa 3 – Të mos humbasë ekuilibrin

Çdo gabim mund të kushtojë. Franca është skuadra më e rrezikshme në kundërsulm, me Mbappe-në, Dembele, Olise dhe Doué që kanë aftësinë të përshkojnë gjysmën e fushës me vetëm pak pasime. Spanja duhet të sulmojë, por pa humbur organizimin.

Etapa 4 – Muri francez

Saliba dhe Upamecano formojnë një nga dyshet më të forta të mbrojtjes në turne. Ata dominojnë duelet fizike, janë të shpejtë dhe shumë të fortë në lojën ajrore. Kalimi i kësaj pengese do të jetë një nga çelësat e ndeshjes.

Etapa 5 – “Laboratori” i Olise

Nëse Mbappe është realizuesi, Michael Olise është arkitekti i sulmit francez. Mesfushori i Bayernit lëviz në çdo zonë të fushës, krijon hapësira dhe është asistuesi më i mirë i Botërorit. Nëse i jepet liri, ai mund të ndryshojë ritmin e ndeshjes me një pasim të vetëm.

Etapa 6 – Fituesi “i heshtur” i Topit të Artë

Vëmendja është te Mbappe, por Ousmane Dembele po zhvillon një Botëror të jashtëzakonshëm. Me pesë gola dhe disa asistime, ai është bërë një nga armët më të forta të Francës falë shpejtësisë dhe aftësisë për të çarë çdo mbrojtje.

Etapa 7 – Makineria e golave

Franca ka sulmin më produktiv të Botërorit. Skuadra e Didier Deschamps ka shënuar 16 gola dhe realizon me efikasitet të lartë, duke kthyer në gol rreth 15% të goditjeve drejt portës.

Etapa 8 – Përqendrim deri në sekondën e fundit

Një nga cilësitë më të mëdha të Francës është aftësia për të vendosur ndeshjen me vetëm një aksion. Edhe kur duket se është nën kontroll, mjafton një kundërsulm i Mbappe-së, një pasim i Olise-s apo një shpërthim i Dembele-së për të ndryshuar gjithçka. Spanja duhet të ruajë përqendrimin gjatë gjithë 90 minutave.

Etapa 9 – Shpejtësia vdekjeprurëse

Pak skuadra sulmojnë me ritmin e Francës. Mbappe ka regjistruar shpejtësinë më të lartë të Botërorit, 37.6 km/h, ndërsa Dembele, Doué, Olise dhe Koné e bëjnë çdo kundërsulm jashtëzakonisht të rrezikshëm. Për këtë arsye, Laporte dhe Cubarsí do të kenë një rol vendimtar në mbrojtje.

Etapa 10 – ‘Maja e Tourmalet’ quhet Kylian Mbappe

Sfida më e madhe është vetë kapiteni i Francës. Mbappe vjen në gjysmëfinale si një nga golashënuesit më të mirë të Botërorit, në formë të shkëlqyer dhe i aftë ta vendosë ndeshjen me një sprint, një lëvizje ose një goditje. Edhe nëse Spanja arrin të kalojë të gjitha pengesat e tjera, për të shkuar në finale duhet të mposhtë edhe ‘malin’ më të lartë të këtij Botërori: Kylian Mbappe.