Monza është skuadra e tretë që siguron ngjitjen në Serie A për sezonin e ardhshëm, duke iu bashkuar Venezias dhe Frosinones mes ekipeve të promovuara. Bardhekuqtë arritën objektivin pas një finaleje dramatike të play-off-it ndaj Catanzaros.

Skuadra kalabreze ishte shumë pranë një përmbysjeje historike. Pas humbjes 2-0 në ndeshjen e parë, Catanzaro triumfoi me të njëjtin rezultat në transfertën e Monzës, duke barazuar rezultatin e përgjithshëm të dy takimeve. Megjithatë, kjo nuk mjaftoi për të siguruar promovimin, pasi rregullorja favorizonte Monzën falë renditjes më të mirë në kampionat, ku ekipi brianzol e kishte mbyllur sezonin në vendin e tretë.

Miqtë nisën të besonin te mrekullia në minutën e 39-të, kur Felipe Jack shfrytëzoi në mënyrën më të mirë një goditje dënimi nga e majta dhe me kokë dërgoi topin në rrjetë për 1-0.

Pas pushimit, tensioni u rrit ndjeshëm në kampin e Monzës, ndërsa Catanzaro vazhdoi të sulmonte në kërkim të golit të dytë. Ai erdhi në minutën e 78-të, kur zëvendësuesi Frosinini realizoi sërish me kokë, duke ndezur shpresat e kalabrezëve për një përmbysje të pabesueshme.

Minutat e fundit ishin tepër të zjarrta, me kartonë të shumtë të verdhë dhe tension edhe në pankina, ku nuk munguan përjashtimet. Megjithatë, Monza arriti të rezistojë deri në vërshëllimën përfundimtare, duke festuar rikthimin në elitën e futbollit italian vetëm një vit pas rënies në Serie B.

Për Catanzaron mbetet zhgënjimi i një ëndrre të sfumuar në prag të realizimit, por edhe krenaria për një sezon të jashtëzakonshëm që e çoi shumë pranë promovimit në Serie A.