Finalja e UEFA Champions League mes Paris Saint-Germain dhe Arsenalit do të luhet këtë vit në një orar të pazakontë për tifozët europianë: në orën 18:00. Vendimi i UEFA ka shkaktuar diskutime të shumta, por pas tij fshihen disa arsye të rëndësishme organizative, televizive dhe sportive.

Një nga përfitimet kryesore lidhet me audiencën globale. Duke qenë se futbolli europian ndiqet nga miliona tifozë në Azi, Amerikë dhe Lindjen e Mesme, një orar më i hershëm favorizon transmetimin në kohë më të përshtatshme për tregje të mëdha televizive. UEFA synon kështu të rrisë shikueshmërinë dhe të afrojë edhe më shumë publikun ndërkombëtar me finalen më të rëndësishme të klubeve.

Një tjetër arsye është siguria dhe organizimi logjistik. Ndeshjet që përfundojnë më herët u japin tifozëve mundësi të largohen më lehtë nga stadiumi dhe qyteti pritës, duke reduktuar problemet me transportin, rendin publik dhe flukset e mëdha të njerëzve gjatë natës.

Përveç kësaj, qytetet pritëse do të përfitojnë gjithashtu sepse tifozët do të kenë më shumë kohë për të festuar dhe për t'u shoqëruar pas ndeshjes.

“Me këtë ndryshim, ne e vendosim përvojën e tifozëve në qendër të vëmendjes. Finalja e Ligës së Kampionëve është kulmi i sezonit të futbollit dhe ora e re e fillimit do ta bëjë atë edhe më të arritshme, gjithëpërfshirëse dhe mbresëlënëse për të gjithë pjesëmarrësit.

Ora e re e finales të së shtunës do të thotë që ndeshja do të përfundojë më herët, edhe nëse shkon në kohë shtesë ose penallti, gjë që u jep tifozëve mundësinë të shijojnë pjesën tjetër të mbrëmjes me miqtë dhe familjen", ka thënë presidenti i UEFA-s, Aleksander Ceferin.