Gjykata Evropiane e të Drejtave të Njeriut (GJEDNJ) ka vendosur se Turqia duhet të bëjë reforma të mëtejshme në ligjet që rregullojnë gjykatën arbitrare të federatës turke të futbollit, pasi funksionimi aktual nuk garanton të drejtën e futbollistëve për një proces të drejtë.

Vendimi u mor në lidhje me ankesën e mbrojtësit turk, Kutay Yokuslu, dhe në dokumente të KEDNJ-s theksohet se ekzistojnë rreth 65 ankesa të tjera me problematika të ngjashme. Rasti konkret daton në vitin 2023, kur lojtarit i duhej të paguheshin rrogat e prapambetura. Ai kërkoi nga avokati i tij të dërgonte një paralajmërim te klubi, duke deklaruar se do ta ndërpriste kontratën 30 ditë më pas nëse pagesa nuk realizohej. Klubi përmbushi pagesën, por futbollisti harroi të njoftonte avokatin, i cili më pas dërgoi te federata njoftimin për ndërprerje kontrate. Federata refuzoi të anulonte ndërprerjen, dhe çështja përfundoi te gjykata arbitrare e federatës, e cila vendosi në favor të federatës.

Megjithatë, KEDNJ argumenton se gjykata arbitrare, edhe pas reformave të vitit 2022 të imponuara pas një vendimi të mëparshëm të Gjykatës, nuk mund të konsiderohet ende si një “gjykatë e pavarur dhe e paanshme”, veçanërisht kur kontesti përfshin një lojtar kundër federatës.

Sipas KEDNJ, shkelja e së drejtës për një proces të drejtë është pjesërisht rezultat i boshllëqeve ligjore, por edhe i praktikës që në çdo zgjedhje të re të organeve ekzekutive të federatës kërkohet dorëheqja e anëtarëve aktualë të gjykatës arbitrare para përfundimit të mandatit të tyre, dhe zgjidhen të rinj.

Ky vendim e detyron Turqinë të ndërmarrë reforma serioze për të garantuar pavarësi dhe paanshmëri në gjykatat arbitrare të futbollit, në mënyrë që të respektohen të drejtat e lojtarëve.