Sipas asaj që raporton Mundo Deportivo, talenti i Barcelonës Lamine Yamal po punon me një program të strukturuar rikuperimi për të kaluar problemet kronike në zonën pubike. Ylli 18-vjeçar iu nënshtrua një trajtimi invaziv gjatë pauzës ndërkombëtare, gjë që e detyroi të mungonte në dy ndeshjet kualifikuese të Spanjës për Kupën e Botës kundër Gjeorgjisë dhe Turqisë.

Në ditët e fundit, Yamal ka nisur të punojë edhe me fizioterapistët e klubit, përfshirë Dr. Ernest Schilders dhe Dr. Pruna, me synimin që rikuperimi të përshpejtohet sa më shumë. Lojtari zhvilloi stërvitje në grup gjatë ditës së djeshme dhe do të jetë i gatshëm për sfidën e La Ligas të së shtunës ndaj Athletic Bilbaos në “Spotify Camp Nou”.

Megjithatë, stafi teknik i Barcelonës nën drejtimin e Hansit Flick do të menaxhojë me kujdes minutat e tij, në mënyrë që ai të jetë në gjendje optimale për ndeshjen e Ligës së Kampionëve kundër Chelsea-t javën e ardhshme.

Edhe pse është vendosur që ndërhyrja kirurgjikale të shmanget, Yamal po ndjek një protokoll të rreptë rikuperimi për të mos rrezikuar rikthimin e dëmtimit.

Duket se problemi fizik tashmë ka mbetur pas, pasi talenti i Barcelonës ka gjetur formën e tij më të mirë: tre gola dhe një asist në tri ndeshjet e fundit flasin për gjendjen e tij të shkëlqyer.