Nottingham Forest e zgjati nëntë ndeshje serinë pa fitore në Premier League pas barazimit 2-2 ndaj Manchester United, pavarësisht një përmbysjeje të shpejtë në pjesën e dytë. United, që fitoi të gjitha ndeshjet e Premier League-s në tetor, e nisi më mirë takimin dhe krijoi raste të mira me Benjamin Šeško-n, por sulmuesi slloven dështoi në dy tentativa të mira herët në ndeshje. Forest humbi Douglas Luiz për shkak të një problemi muskulor, ndërsa United shpërbleu dominimin me golin e Casemiro-s pas një goditjeje këndi, me brazilianin që po vazhdon traditën e tij të shkëlqyer kundër Forest.

Pjesa e dytë nisi me presion të madh të Forest dhe skuadra vendase përmbysi gjithçka brenda 92 sekondave. Morgan Gibbs-White barazoi me një goditje me kokë, ndërsa Nicolò Savona shënoi golin e përmbysjes pas një tjetër topi të futur në zonë. Bruno Fernandes goditi shtyllën teksa United kërkoi reagimin, dhe Forest ishte pranë golit të tretë me Hudson-Odoi.

Megjithatë, të zotët e shtëpisë u tërhoqën shumë mbrapa dhe United e shfrytëzoi këtë: pas një goditjeje këndi të pamenaxhuar mirë, Amad Diallo barazoi me një volej të fuqishme. Në minutat finale të dy ekipet kishin raste për të marrë fitoren, me United që iu afrua më shumë, por një ndërhyrje shpëtuese në vijën e portës shmangu golin. Për United, ky ishte një tjetër dështim për të marrë fitore radhazi në transfertë, duke mbetur me vetëm një triumf në 10 ndeshjet e fundit jashtë ‘Old Trafford’-it.

Ndërkohë, Arsenali vijon serinë e fitoreve, këtë here në fushën e Burnley-t, ku triumfoi me rezultatin e pastër 2-0. Për ‘Topçinjtë’ realizuan që në pjesën e parë Gyokeres dhe Rice, ndërsa në pjesën e dytë pati vend edhe për Armando Brojën në fushë (76’), por sulmuesi shqiptar nuk mundi të linte gjurmë.