Alan Shearer ka paralajmëruar Liverpool-in se humbja ndaj Aston Villës këtë fundjavë mund t’i shuajë përfundimisht ëndrrat për të mbrojtur titullin e Premier League-s.

“Nëse do të humbin të shtunën, unë nuk i shoh ata në garë për titull,” tha ish-sulmuesi i Newcastle-it për Betfair.

“Nëse do të fitojnë, do të ndërtojnë vetëbesim, sepse e kanë ende cilësinë për të bërë një seri të madhe rezultatesh. E shtuna është vendimtare, një tjetër humbje dhe unë mendoj se ata dalin nga gara.”

Liverpool-i është në një krizë të thellë formë, pasi ka pësuar katër humbje radhazi në Premier League dhe aktualisht është shtatë pikë prapa Arsenalit. Diferenca nuk është e pakapërcyeshme, por “Reds” duhet të gjejnë zgjidhje sa më shpejt, nëse nuk do të duan të mbeten edhe më prapa në garë.

Sfida e së shtunës në mbrëmje ndaj Aston Villës pritet të jetë një test vendimtar për ekipin e Arne Slot, i cili do të kërkojë të rikthejë besimin dhe ritmin për të mos humbur hapin me rivalët kryesorë për titullin.