Katër persona ndodhen në gjendje të rëndë pas një aksidenti të frikshëm që përfshiu një autobus me tifozë të Flamengos, i cili u përmbys të hënën në Rio de Janeiro. Autobusi po udhëtonte drejt Avellanedas, në Argjentinë, ku ekipi brazilian do të përballet të mërkurën me Racing Club në ndeshjen e kthimit të gjysmëfinales së Copa Libertadores.

Sipas autoriteteve braziliane, aksidenti ndodhi në autostradën Via Dutra, rruga kryesore që lidh qytetet e mëdha Rio de Janeiro dhe Sao Paulo. Shkaqet e përmbysjes mbeten ende të paqarta, por në momentin e ngjarjes po binte shi.

⚠️ Vídeo do momento em que o ônibus que levava torcidas organizadas do Flamengo para a Argentina capotou.

🗞 | 🎥 @venecasagrande pic.twitter.com/22Xmlk7GZH

— Planeta do Futebol 🌎 (@futebol_info) October 27, 2025

Kompania që administron autostradën, CCR RioSP, konfirmoi se 46 persona janë plagosur në total: 32 me lëndime të lehta, 10 me plagë të moderuara dhe 4 në gjendje të rëndë. Në vendngjarje ndërhynë menjëherë zjarrfikësit, policia dhe ekipet e shpëtimit për të ndihmuar të lënduarit dhe për të menaxhuar qarkullimin.

Klubi i Flamengos njoftoi në mbrëmje se është në kontakt të drejtpërdrejtë me kryetarin e bashkisë së Barra Mansa, Luiz Furlani, i cili vuri në dispozicion spitalet lokale për trajtimin e të plagosurve. Klubi shtoi se po bashkëpunon me Policinë Federale Rrugore dhe po ndjek me vëmendje gjendjen e tifozëve.

Flamengo fitoi 1-0 ndeshjen e parë të gjysmëfinales ndaj Racingut falë një autogoli të Marcos Rojos në minutën e 88-të. Skuadra braziliane, tri herë kampione e Copa Libertadores dhe aktualisht vetëm një pikë prapa Palmeiras në Serie A, shpreson të arrijë finalen, ndërsa komuniteti i saj po lutet për shërimin e tifozëve të plagosur.