Fillimi i aventurës së Tijjani Reijnders te Manchester City dukej premtues. Pas paraqitjeve të mira me fanellën e Milanit, mesfushori holandez kishte fituar menjëherë besimin e Pep Guardiolës dhe pritshmëritë e tifozëve “citizens”. Por me kalimin e javëve, forma e tij është zbehur ndjeshëm, duke u kthyer në një nga çështjet më të diskutuara në kampin blu të Manchesterit.

Performancat nën nivel kanë nxitur pakënaqësinë e tifozëve, të cilët e kanë kritikuar hapur për mungesë ndikimi në lojë. Ndeshja e fundit, ajo e humbur 1-0 ndaj Aston Villës në “Villa Park”, ishte shembulli më i qartë i krizës së Reijndersit: i vendosur në rolin e mesfushorit defensiv, pozicion që nuk i përshtatet plotësisht, ai nuk fitoi asnjë nga shtatë duelet dhe nuk arriti të ndalojë sulmet e kundërshtarëve. Krahasimi me Rodrin, liderin e zakonshëm të mesfushës, e vuri në vështirësi të dukshme.

Pas një fillimi të mirë me gola dhe asistë ndaj Wolverhamptonit, e më pas dy pasime decizive mes ndeshjeve me Napolin dhe Arsenalin, Reijnders duket se ka humbur shkëlqimin. Pjesa më e madhe e tifozëve janë të zhgënjyer, ndërsa të tjerë e shohin si një simptomë të një problemi më të gjerë që ka prekur gjithë skuadrën e Guardiolës.

City ndodhet aktualisht në vendin e pestë, gjashtë pikë larg Arsenalit kryesues, dhe kërkon me ngulm një “tronditje” pozitive. Edhe për Reijndersin, ky është momenti për të reaguar: për të rifituar vendin në formacion dhe për të treguar se mund të jetë jo vetëm një mbështetje për Haalandin, por edhe një shtyllë e fortë në fazën mbrojtëse. Vetëm kështu mund të rikthehet versioni i tij më i mirë, ai që shkëlqeu dikur me Milanin.