Charles Leclerc nuk do të përballet me penalizime pas incidentit të ndodhur në “pit lane” gjatë provave të lira të dyta të Çmimit të Madh të Singaporit. Drejtuesit e garës shqyrtuan rastin pas kontaktit me McLaren-in e Lando Norris, por vendosën të mos ndëshkojnë pilotin monegask. Megjithatë, Ferrari u gjobit me 10 mijë euro për incidentin.

Gjithçka ndodhi pas rikthimit në pistë të Leclerc, kur pas një komunikimi jo të qartë me shefin e mekanikëve, ai doli nga bokset në momentin që dy McLaren po kalonin me shpejtësi të kontrolluar. Përplasja mes SF-25 të Leclerc dhe makinës së Norris ishte e lehtë, por mjaftoi për të dëmtuar krahun e përparmë të britanikut, që më pas u detyrua ta ndërrojë.

Norris shpërtheu në radio duke kërkuar menjëherë ndërhyrjen e komisarëve, ndërsa pamjet treguan konfuzionin në komunikimin mes pilotit dhe mekanikëve të Ferrarit.

Në fund, Drejtoria e Garës vlerësoi se incidenti nuk ishte përgjegjësi e drejtpërdrejtë e Leclerc, por e ekipit, i cili tani do të paguajë gjobën për këtë episod që shkaktoi tensione në ‘pit lane’.