Ceremonia e Topit të Artë 2025 nuk kaloi pa zhurmë, por këtë herë në qendër të vëmendjes ishte një njeri që nuk ishte as në garë: Zlatan Ibrahimovic. Ish-sulmuesi suedez, në stilin e tij karakteristik, publikoi një video në Instagram pak orë para nisjes së eventit, duke treguar dhomën e tij të trofeve.

Në video shfaqen dhjetëra kujtime nga një karrierë që zgjati deri në moshën 41-vjeçare. Nga Malmö e deri tek Ajax, Juventusi, Interi, Milani, Barcelona, PSG, Manchester United dhe MLS amerikane – çdo klub ka lënë gjurmë në koleksionin e tij. Në mesin e trofeve dallohen tituj kampioni, kupa kombëtare, çmime individuale dhe topa ndeshjesh me firmën ikonike “Z”.

Një vend të veçantë ka edhe fanella e Suedisë, me numrin 122, që simbolizon paraqitjet e tij me kombëtaren. Edhe pse nuk fitoi trofe me të, kujtimi i golit spektakolar kundër Anglisë në vitin 2012 mbetet i paharrueshëm, një roveshatë nga jashtë zone që Steven Gerrard e quajti “më i bukuri i parë ndonjëherë”.

Reagimet në rrjete sociale ishin të ndara. Disa tifozë e lavdëruan për karrierën e jashtëzakonshme, të tjerë e ironizuan duke e pyetur: “Ku janë Toni i Artë dhe Champions League?” – dy trofe që Zlatan nuk arriti kurrë t’i fitojë. Por vetë ai, me të zakonshmen “legaZy” (lojë fjalësh mes legacy dhe shkronjës Z), e bëri të qartë se për të rëndësi kanë arritjet dhe ndikimi i tij, jo mungesat.

Në stilin e tij madhështor, Ibrahimovic edhe një herë arriti të kujtonte botës futbollistike se kush ishte – një ikonë e pavdekshme e fushës së gjelbër.

View this post on Instagram

A post shared by Zlatan Ibrahimović (@iamzlatanibrahimovic)