Atmosfera para ndeshjes së shumëpritur mes Argjentinës dhe Algjerisë në Kupën e Botës 2026 është tensionuar ndjeshëm, pasi tifozët e dy kombëtareve u përfshinë në një përleshje në qendër të Nju Jorkut.

Incidenti ndodhi në “Times Square”, ku qindra tifozë ishin mbledhur për të festuar dhe mbështetur ekipet e tyre vetëm pak orë para sfidës së Grupit J.

Pamjet që po qarkullojnë në rrjetet sociale tregojnë momente tensioni, me tifozë që shkëmbejnë fyerje dhe më pas përfshihen në përplasje fizike.

🚨A fight between Algeria and Argentina fans occurred in Times Square pic.twitter.com/YWZ4nLGXdj

— Polymarket Sports (@PolymarketSport) June 16, 2026

Situata u përshkallëzua shpejt, duke detyruar ndërhyrjen e forcave të policisë, të cilat krijuan një kordon sigurie për të ndarë grupet rivale dhe për të rikthyer qetësinë në një nga zonat më të frekuentuara të qytetit.

Sipas dëshmitarëve, tifozët argjentinas këndonin dhe valëvitnin flamujt kombëtarë, ndërsa grupet e tifozëve algjerianë iu përgjigjën me thirrje të forta, duke krijuar një atmosferë të ndezur që përfundoi në konfrontim.

Ngjarja ka shkaktuar reagime të shumta në rrjetet sociale, ku shumë tifozë kanë dënuar dhunën, ndërsa të tjerë kanë kërkuar masa më të forta sigurie gjatë turneut.

Përplasja vjen në prag të një ndeshjeje shumë të rëndësishme, ku kampionët në fuqi të botës, të udhëhequr nga Lionel Messi, synojnë ta nisin me fitore mbrojtjen e titullit.

Nga ana tjetër, Algjeria kërkon të bëjë surprizën ndaj një prej favoritëve kryesorë të turneut.

Autoritetet amerikane konfirmuan se situata u vu shpejt nën kontroll dhe nuk pati incidente të tjera serioze.

Megjithatë, ngjarja ka rikthyer shqetësimet për sigurinë dhe sjelljen e tifozëve gjatë Botërorit 2026.

Me emocionet që vazhdojnë të rriten, organizatorët pritet të shtojnë masat e sigurisë rreth stadiumeve dhe zonave të tifozëve për të shmangur përsëritjen e skenave të tilla në ditët në vijim.