Myrto Uzuni ishte njeriu i mbrëmjes në ‘Q2 Stadium’, duke shënuar në minutën e gjashtë të shtesës së pjesës së dytë dhe duke i dhuruar Austin FC një fitore të çmuar 2-1 ndaj Seattle Sounders. Ky sukses ngjit skuadrën vendase në vendin e gjashtë të Konferencës Perëndimore, vetëm një pikë prapa Seattle, që mban vendin e pestë, dhe plot tetë pikë mbi vijën e play-off-it.

Ndeshja nisi me ritëm të lartë dhe u zhbllokua në minutën e 42-të, kur Diego Rubio fitoi një top në presion dhe shënoi me një goditje të saktë në shtyllën e largët, duke i dhënë epërsinë Austin-it. Reagimi i mysafirëve erdhi menjëherë në fillim të pjesës së dytë: në minutën e parë pas pushimit, Georgi Minoungou barazoi rezultatin për Seattle.

Në vijim, portieri Brad Stuver u bë hero për vendasit duke kryer pesë pritje vendimtare që mbajtën gjallë shpresat e Austin-it. Kur gjithçka po shkonte drejt barazimit, skenari u përsërit ashtu si në gjysmëfinalen e Kupës së SHBA-së disa ditë më parë: goli i fitores në sekondat e fundit. Pas një topi të futur në zonë nga Dani Pereira, CJ Fodrey asistoi me kokë dhe aty u gjend Uzuni, i gatshëm për ta shtyrë në rrjetë.

Me këtë gol, sulmuesi shqiptar jo vetëm i siguroi ekipit tri pikë jetike, por edhe ndezi atmosferën në stadium, duke e kthyer ndeshjen në një mbrëmje për t’u mbajtur mend për tifozët e Austin FC.