Milani vazhdon të ndjekë me vëmendje situatën e Ardon Jasharit dhe është në pritje të një përgjigjeje përfundimtare nga Club Brugge. Sipas “Tuttosport”, kuqezinjtë kanë bërë një ofertë prej 32.5 milionë eurosh plus bonuse për mesfushorin zviceran me origjinë shqiptare dhe presin sinjalin përfundimtar nga klubi belg për të nisur lëvizjet konkrete.

Megjithatë, Brugge kërkon të sigurojë më parë një zëvendësues për Jasharin, përpara se të japë dritën jeshile për largimin e tij. Në këtë drejtim, pa dashje, një ndihmë mund të vijë nga... Interi. Klubi zikaltër është në bisedime për shitjen e mesfushorit të ri Aleksandar Stankoviç pikërisht te Club Brugge.

Sipas raportimeve, marrëveshja mes Interit dhe belgëve është shumë pranë, por mbetet për t’u vendosur klauzola e riblerjes. Interi dëshiron që kjo të jetë 25 milionë euro, ndërsa Brugge kërkon që të jetë 30 milionë. Pasi të zgjidhet ky detaj, pritet që transferimi të mbyllet zyrtarisht.

Gjithsesi, edhe nëse Brugge siguron Stankoviçin, kjo nuk do të thotë automatikisht se do të lejojë largimin e Jasharit. Ka mundësi që belgët të synojnë edhe një tjetër mesfushor me profil më të ngjashëm me atë të Jasharit përpara se të finalizojnë shitjen. Në këtë rast, Milani duhet të vendosë: a ia vlen të presë më tej për objektivin e parë, apo të kalojë tek alternativat e tjera që drejtori sportiv Igli Tare ka në listën e tij?

Për momentin, vlerësimet dhe strategjitë janë ende në zhvillim.