Sot është një ditë kyçe për futbollin shqiptar: Vllaznia dhe Partizani zbresin në fushë për të vendosur fatin e tyre në Ligën e Konferencës. Dy përballje që mund të përcaktojnë jo vetëm rrugëtimin europian, por edhe ambiciet e sezonit për të dyja klubet.

Vllaznia, me misionin ‘përmbysje’ në Letoni

Pas humbjes 0-1 në “Elbasan Arena”, kuqeblutë udhëtojnë drejt Letonisë për të përballuar Daugavpils në një transfertë që s’mund ta falë. Shkodranët kanë nevojë për një fitore bindëse për të kaluar turin dhe për të vazhduar ëndrrën europiane. Fati nuk ishte në anën e tyre në ndeshjen e parë, por shanset janë ende të gjalla: me vendosmëri dhe përqendrim, gjithçka është e mundur.

Partizani, favorit në “Air Albania”

Partizani ka një detyrë më të lehtë në letër, por që kërkon seriozitet maksimal. Pas barazimit 1-1 në Estoni kundër Kalju, “demat e kuq” kanë avantazhin e fushës. Një fitore sonte në “Air Albania” do t’i çonte në raundin tjetër dhe do të konfirmonte synimet e larta të klubit për këtë edicion.

Për të dyja skuadrat, kalimi i këtij turi është objektiv minimal. Jo vetëm për prestigj dhe pikë në UEFA, por edhe për motivimin e kampionatit dhe vazhdimësinë financiare të klubit.

Ndeshjet:

Daugavpils – Vllaznia, ora 17:00

Partizani – Nomme Kalju, ora 20:00