Komisioni i Etikës dhe Disiplinës në UEFA ka vendosur të gjobisë Federatën Shqiptare të Futbollit me shumën 21,250 euro për shkak të incidenteve të ndodhura gjatë ndeshjes kualifikuese të Euro 2024, Shqipëri-Moldavi, e luajtur në stadiumin “Air Albania” më 17 qershor 2023.

Lajmin e ka dhënë vetë organi më i lartë vendimarrës i futbollit në Shqipëri, që bën me dije se penalizimi financiar ka ardhur nga problematika e shkaktuar nga grupimi i tifozëve “Tirona Fanatics”, që ndezën flakadanë gjatë ndeshjes, duke shkaktuar kështu trazira dhe situata krejtësisht të evitueshme.

Gjithashtu FSHF u bën thirrje tifogrupeve që të shmangin këto incidente, në mënyrë që mos të sjellin penalitet financiare për Kombëtaren dhe futbollin shqiptar.