Kompeticioni më elitar i futbollit për klube në botë – Liga e Kampionëve, rikthehet sonte me ndeshjet e para të fazës së 1/16-ave dhe sigurisht që vëmendjen më të madhe e tërheq dueli mes PSG-së dhe Bayernit.

PSG do ta presë këtë ndeshje me një atmosferë pak më të keqe në skuadër, sidomos pas disfatës ndaj Monakos në kampionatin vendas, pas së cilës pati një debat në dhomën e zhveshjes së klubit mes drejtuesve dhe lojtarëve, teksa mediat u shprehën se Neymar ishte më i zhurmshmi.

Braziliani foli dje në një konferencë për shtyp duke thënë se gjëra të tilla janë normale në futboll dhe se pas një debati mund të gjesh gjithmonë një marrëdhënie edhe më të mirë dhe e krahasoi atë me të dashurën e tij duke thënë se edhe ai debatonte me të, por në fund të fundit, ata duhet të vazhdojnë.

Ajo që është më e rëndësishme për PSG-në është fakti që Kylian Mbappe dhe Lionel Messi do të jenë gati për duelin e mbrëmjes së sotme, pra që këtë ndeshje të rëndësishme kundër Bayernit ta presin në formacionin më të fortë.

Nga ana tjetër, Bayern pret obligime në Champions League pas fitores në kampionat ndaj Bochum-it me rezultat 3:0, ndërsa sonte do të privohen nga shërbimet e Lucas Hernandez, Mane dhe Neuer.

Dy klubet e përmendura luajtën në çerekfinale të Ligës së Kampionëve në vitin 2021. PSG e fitoi ndeshjen e parë me 3-2, ndërsa në ndeshjen e dytë Bayern triumfoi me rezultatin 1:0, pas së cilës skuadra franceze vazhdoi për shkak të rregullit të asaj kohe “më shumë gola jashtë”.

Në ndeshjen e dytë që do të luhet sonte, Milani do të presë Tottenhamin në stadiumin San Siro dhe kjo do të jetë një ndeshje mes skuadrave që janë në një formë pak më të keqe në kampionatet vendase dhe skuadrave që aktualisht luajnë pa një numër të madh lojtarësh të rëndësishëm dhe të lënduar.

Kështu për Milanin nuk do të luajnë mesfushori Bennacer, mbrojtësit Dest dhe Florenzi, Ibrahimovic dhe portieri Maignan, ndërsa për Tottenhamin nuk do të luajnë mesfushorët Bentancur, Bissouma, Hojbjerg, portieri Lloris dhe mbrojtësi Sessegnon.

Të dyja ndeshjet luhen sonte në orën 21:00.