Erling Haaland po shkëlqen në Premier League teksa për të dytën ndeshjen radhazi shënoi një tregolësh. Në sfidën që Manchester City triumfoi ndaj Nottingham Forest me rezultatin 6-0, tre realizime i takuan pikërisht norvegjezit që tashmë prek kuotën e nëntë golave në vetëm pesë ndeshje.

Sigurisht, për sulmuesin e transferuar këtë merkato nga Borussia Dortmund elozhe vijnë edhe nga trajneri Pep Guardiola. Tekniku spanjoll theksoi me siguri se Haaland do të bëhet një legjendë e Manchester Cityt ndërsa shtoi se sulmuesit nuk i interesojnë rekordet.

“Sergio Aguero është legjendë e klubit, por Haaland ka kualitetin për të mbërritur atje. Haaland ka shumë talent dhe ne duam ta ndihmojmë atë të arrijë sa më shumë me fanellën e Cityt. Duke njohur Haaland mendoj se ai është më i fokusuar te titujt se tek rekordet personale, por nëse arrin të fitojë trofe duke regjistruar edhe rekorde, atëherë aq më mirë”, u shpreh Guardiola.