Ishte një ndeshje spektakolare ajo midis Flamurtarit dhe Bylisit, e vlefshme për javën e 33-të në Kategorinë Superiore.
Në fund kjo sfidë nxori fitues ekipin ballshiot (2-3), të cilët morën tri pikët në sekondat e fundit të ndeshjes.
Në minutën e 32-ë Malçi zhbllokon takimin duke krijuar idenë se mallakastriotët do ta administronin shumë lehtë sfidën. Hoxhaj u kundërpërgjigj 4 minuta më vonë duke përfituar nga një gabim në mesfushë i Bylisit dhe mposhti portierin Isli Hidi.
45 minutat e dyta ishin tepër ekzaltuese. Ballshiotët fitojnë penallti në minutën e 63-ë dhe veterani Isli Hidi e mori përsipër duke mos gabuar para Moçkës.
Sërish Flamurtari u “ktheu reston” miqve, kur Murataj shkakton penallti në minutën e 77-ë. Kapiteni i Flamurtarit Andi Ribaj vendosi sërish takimin në baraspeshë.
Në mintuat e mbetura, Flamurtari tentoi të mbronte rezultatin, kurse Bylisi nuk pajtohej me barazimin. Në të vetmin moment shpërqëndrimi të vlonjatëve, Malçi vulosi fitoren e Bylisit duke marrë me vete një fitore të vuajtur dhe domethënëse, ndërsa Flamurtari merr respektin për përkushtimin në fushë, pavarësisht se tashmë s’ka asnjë objektiv për të përmbushur.
© SYRI.net
Bëje LIKE dhe merr lajmin e fundit nga Sporti: