Berberi shqiptar i brezit të tretë sjell stil retro në dyqanin e dytë në Staten Island

Që kur ishte fëmijë, Jetmir Jani, 37 vjeç, e dinte se donte të bëhej berber. E kishte në gjak. Ai është berber i brezit të tretë dhe e nisi që në moshën 12-vjeçare duke pastruar berberhanen e gjyshit të tij në Shqipëri, ku u rrit. Në moshën 14-vjeçare, kishte filluar të priste flokë.

“Gjatë shkollës së mesme, në verë, punoja me kohë të plotë si berber,” tha ai. “Pastaj, pasi mbarova shkollën, e ktheva në profesion.”

Jani emigroi në Staten Island në vitin 2014. Në vitin 2021, ai dhe partneri i tij i biznesit, Gerti Kercishta, 33 vjeç, hapën berberhanen e tyre të parë, Retro Barbershop, në Great Kills, në adresën 3937 Amboy Road. Ishte kulmi i pandemisë së koronavirusit (COVID-19) dhe në fillim biznesi pati vështirësi. “Kishte punë pak, një situatë e vështirë,” tha Jani. “Të gjithë kishin frikë të prisnin flokët.”

Me kalimin e kohës, dyqani u stabilizua dhe Jani me Kercishtën arritën të hapin një vend të dytë në Westerleigh, në 1898 Victory Boulevard. Dyqani u hap zyrtarisht me 7 prill.

Dizajni vintage i të dyja dyqaneve është frymëzuar nga berberhanja e gjyshit të Janit. “Na pëlqen stili retro, nga vitet ’80 dhe ’90,” tha ai. “Karriget, pasqyrat, dizajni janë retro.”

Salloni në Great Kills ka tetë karrige, ndërsa ai në Westerleigh ka gjashtë. Në total, Retro Barbershop ka 11 berberë.

Klientët, kryesisht meshkuj, variojnë nga të rinjtë deri te të moshuarit. Jani dhe Kercishta u ofrojnë klientëve kopje të gazetës Staten Island Advance në dyqanet e tyre.

Kercishta, i cili gjithashtu ka emigruar nga Shqipëria, punon si berber prej 15 vitesh. “Kjo është jeta ime,” tha ai. “Punoj shumë.”

“Po përpiqem të realizoj ëndrrën amerikane,” tha Jani. “...të ofroj shërbimin më të mirë për klientët, t’i bëj njerëzit të lumtur, të ndërtoj një biznes, të krijoj vende pune. Çdo ditë përpiqem të jap më të mirën për familjen time.”

“E dua punën time,” shtoi Jani. “Nuk mërzitem dhe nuk lodhem kurrë prej saj.” / Silive – Syri.net