Shenjat jo aq të dukshme që tregojnë se një burrë po na gënjen

Në fillim, gjithçka mund të duket e paqartë. Mes mesazheve, takimeve dhe premtimeve të vogla, është e lehtë të humbasësh sensin e realitetit dhe të bindesh se gjithçka po shkon mirë. Por e vërteta është se, shumë shpesh, shenjat janë aty, thjesht nuk duam t’i shohim. Në një lidhje apo flirt, sjellja e një personi thotë shumë më tepër sesa fjalët.

Një nga sinjalet më të zakonshme është kur ai bie në kundërshtim me veten. Një ditë të thotë diçka, ditën tjetër e mohon ose e ndryshon versionin. Nuk ke nevojë të jesh “detektive” për ta kuptuar që diçka nuk shkon, mjafton të vëzhgosh vazhdimësinë.

Po aq e dyshimtë është kur përdor fraza të hapura për interpretim. Shprehje si “do shihemi” apo “jam i hapur për diçka serioze” duken premtuese, por në fakt nuk thonë asgjë konkrete. Kjo është një mënyrë për të mos u angazhuar, duke të mbajtur në pritje pa të dhënë siguri.

Një tjetër “red flag” klasik: ai thotë një gjë dhe bën një tjetër. Mund të të sigurojë se dëshiron diçka serioze, por sjellja e tij, në rrjete sociale apo në jetën reale, tregon të kundërtën. Në këto raste, veprimet janë gjithmonë më të sinqerta se fjalët.