Dita e Shën Patrikut festohet çdo 17 mars, duke shënuar përvjetorin e vdekjes së Shën Patrikut. Edhe pse sot festa është kryesisht laike, origjina e saj vjen nga një festë e krishterë që nderon shenjtin mbrojtës të Irlandës. Dihet mirë se ky peshkop i shekullit të pestë përhapi krishterimin në vend, por shumë detaje të tjera rreth tij janë mbuluar nga mite. Prandaj shpesh lind pyetja: a është vërtet Shën Patriku një shenjt?

A e njeh Kisha Katolike Shën Patrikun si shenjt?

Edhe pse njihet me titullin "shenjt", Kisha Katolike nuk e ka kanonizuar kurrë zyrtarisht Shën Patrikun.

Procesi i kanonizimit në kishë nuk u formalizua deri në Mesjetën e mesme, shpjegon Sarah Waidler, profesoreshë e ftuar e gjuhës, letërsisë dhe kulturës irlandeze në New York University. Meqë Patriku jetoi shumë kohë përpara kësaj periudhe, nuk ekzistonte një procedurë zyrtare për ta shpallur shenjt.

Megjithatë, kalendari liturgjik i dioqezave katolike në Shtetet e Bashkuara e shënon 17 marsin si një përkujtim opsional për "Shën Patrikun, peshkop".

Si u bë Shën Patriku shenjt nëse nuk u kanonizua?

Në mungesë të një procesi formal, të krishterët në Irlandë e forcuan reputacionin e Shën Patrikut si shenjt. Sipas Waidler, shumica e shenjtorëve irlandezë fillimisht nuk u kanonizuan zyrtarisht.

"Në vend të kanonizimit, shumica e shenjtorëve në Irlandë u njohën në mënyrë më popullore, ku mbështetësit vendas e shpallnin një person shenjt pas vdekjes së tij", thotë ajo.

Shën Malakia, i cili vdiq në vitin 1148, u bë shenjti i parë irlandez që u kanonizua zyrtarisht në vitin 1190.

Për çfarë është më i njohur Shën Patriku?

Shën Patriku njihet më së shumti për sjelljen e krishterimit në Irlandë në shekullin e pestë, sipas Diarmuid Wheeler-it, drejtor i Chelsea Academy, një shkollë katolike në Front Royal, Virginia, United States.

I quajtur "apostulli i Irlandës", edhe pse nuk kishte lindur në Irlandë, atij i atribuohet kthimi i irlandezëve galë nga paganizmi në krishterim. Puna e tij misionare përfshinte themelimin e manastireve dhe kishave nëpër ishull, në vende si Sauli dhe Armagh-u. Sipas BBC-së, Armagh-u konsiderohet kryeqendra e krishterë e Irlandës.

"Fakti që veprat e tij kanë mbijetuar deri sot, së bashku me përpjekjet politike të disa prej kishave të tij, veçanërisht në Armagh, e vendosi atë në një pozicion ideal për t'u identifikuar si shenjti kryesor që e ktheu Irlandën në krishterim", thotë Waidler.

Shumë legjenda lidhen gjithashtu me Shën Patrikun, përfshirë historinë se ai dëboi gjarpërinjtë nga Irlanda dhe se përdori tërfilin për të shpjeguar Trininë e Shenjtë.

Për çfarë është shenjt mbrojtës Shën Patriku?

Shën Patriku njihet më së shumti si shenjt mbrojtës i Irlandës, së bashku me Sën Brixhidën dhe Shën Kolamcillin. Ai konsiderohet gjithashtu shenjt mbrojtës i inxhinierëve, sepse solli teknika të reja ndërtimi te irlandezët, si edhe shenjt mbrojtës i Nigerisë për shkak të disa misioneve irlandeze atje që nga vitet 1920.

Shumica e shenjtorëve irlandezë themeluan vendet e tyre kishtare, të cilat shpesh e promovonin themeluesin si shenjt mbrojtës pas vdekjes së tij, sipas Waidler-it.
"Këto vende mund të bëheshin shumë të fuqishme, si në rastin e një prej vendeve të lidhura me Patrikun në Armagh, në Irlandën e Veriut, që promovoi fuqishëm kultin e Patrikut në Mesjetën e hershme", thotë ajo.

St. Patrick's Cathedral, Armagh ndodhet ende sot atje, megjithëse ndërtesa është shkatërruar dhe rindërtuar disa herë gjatë historisë së saj. / History – Syri.net