Studimet në fushën e kronobiologjisë tregojnë se koha kur zgjohemi luan një rol thelbësor në përmirësimin e lumturisë dhe mirëqenies sonë.

Për shumë njerëz, ora e zgjimit nuk shihet si faktor i rëndësishëm, për sa kohë që gjumi është i mjaftueshëm dhe cilësor. Megjithatë, momenti kur hapim sytë ndikon drejtpërdrejt në ekuilibrin tonë fizik dhe mendor.

Sipas një studimi të botuar në revistën Chronobiology International, përshtatja e gjumit me ciklet natyrore të dritës së diellit është veçanërisht e dobishme. Zgjimi herët në mëngjes, idealisht në agim, jo vetëm që përmirëson cilësinë e gjumit, por gjithashtu rrit prodhimin e endorfinave, të njohura si ‘hormonet e lumturisë’, raporton terra.com.br.

Ky zakon është i përhapur veçanërisht në Japoni, ku shumë njerëz zgjohen në orën 7 të mëngjesit gjatë dimrit dhe në orën 6 gjatë verës.

Si të rregulloni ritmin e gjumit në mënyrë të shëndetshme?

Rregullimi i orarit të gjumit kërkon disiplinë dhe nuk është gjithmonë i lehtë, sidomos kur rutina ditore është e ngarkuar. Megjithatë, ekspertët këshillojnë një qasje graduale për të kaluar në një ritëm më natyral:

-Ndryshoni orën e gjumit gradualisht: Lëvizeni kohën e fjetjes me 10–15 minuta çdo natë për të arritur një ritëm të rehatshëm, pa stres të panevojshëm.

-Shmangni përdorimin e ekraneve një orë para gjumit: Drita blu nga telefonat, televizorët apo kompjuterët ndikon negativisht në prodhimin e melatoninës, hormonit që ndihmon në përgatitjen për gjumë.

-Zgjidhni aktivitete qetësuese para gjumit: Leximi, meditimi apo aktivitete të qeta kreative ndihmojnë trupin dhe mendjen të relaksohen dhe të përgatiten për një gjumë të thellë.

Dëgjoni orën tuaj biologjike

Megjithatë, është e rëndësishme të pranojmë se secili prej nesh ka një ritëm biologjik unik.

Disa njerëz ndihen natyrshëm energjikë që në orët e para të mëngjesit, ndërsa të tjerët funksionojnë më mirë më vonë gjatë ditës, pa ndikuar kjo në nivelin e tyre të lumturisë apo produktivitetit.

Gjëja më e rëndësishme është të dëgjoni trupin tuaj dhe të krijoni një rutinë të qëndrueshme, që ju ndihmon të flini dhe të zgjoheni me qetësi.