Presidenti i Fondacionit “Pema e Jetës”, Tanush Çaushi, ka qenë i ftuar në një lidhje të drejtpërdrejtë në emisionin “Kafe Shqeto” në SYRI TV. Gjatë intervistës, ai ngrit shqetësime të rëndësishme për trajtimin e pacientëve që vuajnë nga skleroza multiple.

Përmes një analize të situatës aktuale, Çaushi theksoi se numri i të trajtuarve është shumë i ulët, duke u përqendruar në statistikat zyrtare që tregojnë se vetëm një pjesë e vogël e pacientëve marrin trajtim. Ai po ashtu theksoi rëndësinë e ndjekjes së protokolleve ndërkombëtare dhe përdorimit të medikamenteve të miratuara nga OBSH-ja. Sipas tij, problemi është i thellë dhe kërkon masa të menjëhershme për të siguruar trajtim të barabartë dhe të duhur për të gjithë ata që kanë nevojë.

Çaushi kërkoi gjithashtu një mbështetje më të madhe financiare dhe kthimin e parave që pacientët kanë paguar për trajtimet. Ai shprehu shqetësimin se pritshmëritë për përmirësim janë ulur për shkak të mungesës së reagimit nga shteti dhe autoritetet shëndetësore.

Çaushi:

Ka njerëz që vuajnë nga një sëmundje shumë e rëndë si skleroza multiple dhe nuk trajtohen, numri është shumë i ulët krahasuar me numrin e përgjithshëm të deklaruar zyrtarisht, nëqoftëse flasim për 1000 persona të deklaruar zyrtarisht rreth 165 trajtohen.

Nga këta 165, rreth 65 marrin këtë lloj medikamenti. Ndërkohë që sipas protokolleve të Federatës Ndërkombëtare të Sklerozës Multiple, të gjithë pacientët, pavarësisht gjendjes së tyre, gjendje të mirë apo gjendje shumë të keqe apo të keqe, duhet që patjetër të marrin medikamentet e miratuara nga OBSH-ja.

Ky është një problem tjetër, sepse po të marrim për shembull medikamentet, nuk duhet të ndryshohen herë pas here llojet e medikamenteve pasi është efekt placebo, përveçse cilësisë që nuk jemi të sigurt për cilësinë e medikamenteve, është dhe efekti placebo.

Kjo është një histori që po përsëritet dhe pse nuk merren masa dhe pse nuk koordinohet kjo çështje, kjo është pyetja. E kemi bërë si kërkesë subvencionimin e diferencës monetare për ata që nuk marrin ilaçin e sklerozës, por ne themi që urojmë të na sillet ilaçi.

Janë ulur pritshmëritë, në momentin që s’ka reagim nga shteti, në momentin që s’ka reagim nga ministria, detyrimisht pritshmëritë tona pastaj… themi shpresojmë, të paktën na sill ilaçin.

Por ne kemi bërë edhe kërkesën për kthimin e atyre lekëve të cilët këta pacientë kanë paguar, përveçse sigurimit të medikamentit në mënyrë të qëndrueshme, edhe kthimin e këtyre parave që këta njerëz kanë paguar, këta persona… pagesë kjo që duhej të ishte 0 normalisht, po është me një pagesë mujore.