Një nga zonat me bukuri të veçanta natyrore, vetëm 20 kilometra larg qytetit të Elbasanit, po përballet me mungesë investimesh dhe infrastrukturë të amortizuar. Banorët e fshatit Funar denoncojnë se rruga që lidh zonën me qytetin është në gjendje të rënduar, ndërsa institucionet, sipas tyre, nuk u janë përgjigjur ankesave të vazhdueshme.

Megjithëse kanë kaluar vetëm dy vite nga investimi i fundit për riasfaltimin e rreth 5 kilometrave të rrugës, në segmente të ndryshme janë krijuar gropa dhe çarje të shumta, duke e bërë qarkullimin të vështirë dhe problematik.

Banorët thonë se e kanë ngritur vazhdimisht këtë shqetësim pranë institucioneve përgjegjëse, por nuk kanë marrë asnjë reagim. Sipas tyre, Funari është lënë në harresë, pavarësisht potencialit të madh turistik që ofron.

Gjendja e rrugës krijon vështirësi jo vetëm për banorët, por edhe për vizitorët që frekuentojnë liqenin e Funarit, një nga destinacionet më të njohura natyrore të zonës.

Ndërkohë, mungesa e kushteve bazë të jetesës dhe e mundësive për punësim ka shtuar fenomenin e emigrimit. Sipas banorëve, shumë të rinj janë larguar jashtë vendit, duke lënë pas shtëpitë e tyre dhe duke e çuar zonën drejt shpopullimit.