Pelegrinazhi i 13 të martave bashkon shqiptarët që zgjedhin të vizitojnë Kishën e Shna Ndout në Laç. Besimtarët shkojnë aty për të ndezur qirinj, për të ndjekur meshën e për t’u lutur për shëndet dhe paqe.
Nga SYRI TV
Pelegrinazhi i 13 të martave bashkon shqiptarë të cilët i përkasin feve të ndryshme, myslimanë, katolikë, ortodoksë, ku pavarësisht besimit të tyre zgjedhin të vizitojnë “vendin që bën mrekulli”, kishën e Shna Ndout.
Me qindra pelegrinë iu drejtuan këtij vendi të shenjtë që në orët e para të mëngjesit, duke u lutur për mirësi, paqe dhe shërimin e të afërmëve të tyre.
Disa prej besimtarëve tregojnë edhe për mrekullitë që kanë ndodhur në vendin e shenjtë.
Të rinj e të moshuar zgjedhin ta bëjnë këtë rrugëtim në shenjë sakrifice në emër të besimit në Kishën e Laçit.
Kisha e Laçit, e njohur ndryshe dhe si Kisha e Shna Ndout, prej vitesh njihet si një vend i shenjtë, ku mijëra besimtarë nga e gjithë Shqipëria po edhe jashtë saj e vizitojnë këtë vend kryesisht gjatë 13 të martave të shenjta, që nisin prej 14 marsit dhe kulminojnë më 13 qershor, ditën e madhe të shenjtit.
Gazetar: M. Marku
Pamje: Syri TV
Montazhier: L.Kotri
© SYRI.net