Qelizat e nënës mund të depërtojnë në trurin e foshnjës para lindjes dhe të mbijetojnë për dekada

Një studim i ri sugjeron se qelizat e nënës mund të kalojnë në trurin e foshnjës gjatë shtatzënisë dhe të qëndrojnë aty për shumë vite, madje deri në moshën e rritur. Gjetjet janë publikuar në platformën bioRxiv dhe ende nuk janë rishikuar nga ekspertë të pavarur.

Fenomeni njihet si mikrokimerizëm, një proces biologjik gjatë të cilit nëna dhe fetusi shkëmbejnë qeliza përmes placentës. Studime të mëparshme kishin treguar se edhe nënat mbajnë qeliza me ADN-në e fëmijëve të tyre, por kjo është ndër provat më të forta se edhe fëmijët mund të mbajnë qeliza të nënës në tru për dekada.

Për të hetuar këtë fenomen, shkencëtarët analizuan inde të trurit të marra gjatë operacioneve te 37 fëmijë me epilepsi të rëndë, të moshës nga 28 ditë deri në 19 vjeç. Duke krahasuar ADN-në e nënave me mostrat e trurit, ata zbuluan se 70% e fëmijëve kishin qeliza të nënës në zona të ndryshme të trurit, përfshirë lobet frontal, temporal e parietal, si edhe hipokampusin.

Megjithëse numri i këtyre qelizave ishte zakonisht i vogël, studiuesit besojnë se ai mund të jetë nënvlerësuar për shkak të kufizimeve të metodave aktuale të zbulimit. Ata vunë re gjithashtu se fëmijët e parë në familje kishin më shumë gjasa të mbanin qeliza të nënës në tru.

Duke përdorur teknika të avancuara gjenetike, ekipi zbuloi se këto qeliza nuk mbeten të pandryshuara. Ato shndërrohen në lloje të ndryshme qelizash të trurit, përfshirë neurone, qeliza që mbështesin funksionimin e tyre, qeliza imunitare të trurit dhe qeliza që formojnë enët e gjakut. Kjo sugjeron se ato mund të marrin pjesë aktivisht në funksionimin normal të trurit.

Për të parë nëse fenomeni shfaqej edhe te njerëzit pa epilepsi, studiuesit analizuan mostra të trurit nga 32 persona pa sëmundje të njohura neurologjike, nga fetuse deri te individë mbi 90 vjeç. Ata gjetën qeliza "të huaja" në 78% të rasteve, përfshirë edhe te një burrë në të nëntëdhjetat. Edhe pse nuk mund të konfirmohej plotësisht origjina e tyre, studiuesit besojnë se shumica ishin qeliza të nënës.

Numri i këtyre qelizave zvogëlohej me kalimin e moshës, por ato nuk zhdukeshin kurrë plotësisht. Sipas ekspertëve, zbulimi ngre pyetje të rëndësishme: a ndihmojnë këto qeliza në zhvillimin dhe mirëmbajtjen e trurit, apo janë thjesht një pasojë e shtatzënisë? Përgjigjja ende nuk dihet, por studiuesit besojnë se kuptimi i rolit të tyre mund të ndihmojë në shpjegimin e zhvillimit të shëndetshëm të trurit dhe ndoshta edhe të disa sëmundjeve neurologjike. /Live Science – Syri.net