Më mirë Romelu Lukaku apo Erling Haaland? Një pyetje e pakëndshme për Kevin De Bruyne, që, gjithsesi, mesfushori belg i është dashur t’i përgjigjej në konferencën për shtypin në prag të ndeshjes së radhës.

“Nuk është shumë bukur të ma bësh këtë pyetje, por unë zgjedh Haalandin, sepse ai ka diçka të veçantë. Unë e dua shumë Romin, ai është vëllai im i vogël. Por Erling është një lojtar i veçantë dhe këtë na e ka treguar deri më tani te Manchester City. Rom ka shënuar 300-400 gola, Haaland mund të arrijë 800, 900 apo 1000 gola. Karakteristikat e tij dhe aftësitë e shënimit janë të pazakonta. Thënë këtë, jam krenar që mund të luaj me të dy.”