Ylli i Formula 1, Lewis Hamilton, ka qëndruar në solidaritet me lojtarët francezë që u abuzuan në mënyrë racore në internet pas humbjes së tyre në finalen e Kupës së Botës ndaj Argjentinës.

Aurelien Tchouameni dhe Randal Kolo Muani ishin shënjestër e fyerjeve raciste, pasi Tchouameni humbi penalltinë dhe Kolo Muani një rast 100% të mirë shënimi.

Hamilton shkroi në “Instagram” për t’iu kundërpërgjigjur fyerjeve raciste ndaj tyre, pasi ishin detyruar të fiknin komentet në mediat e tyre sociale për shkak të sasisë së abuzimit racist që po merrnin.

Legjenda e F1 dënoi sulme të tilla dhe theksoi përpjekjet që dy lojtarët kishin bërë për vendin e tyre.

“I neveritur por jo i befasuar”, ka shkruar Hamilton në Instagram. “(Tchouameni) dhe (Kolo Muani) dhanë gjithçka. Ata janë heronj për shumë njerëz dhe nuk meritojnë asgjë përveç respektit”, shkruan piloti britanik.

Vetë Hamilton ka qenë subjekt i abuzimeve raciste dhe ka qenë një zë i shpeshtë në dënimin e sulmeve të tilla në të gjithë sportin.

Tchuoameni dhe Kingsley Coman i Bayern Munchen humbën penallti në finalen e Kupës së Botës, ndërsa Kolo Muani hodhi poshtë një mundësi në sekondat e fundit të kohës shtesë.

Përgjigjet e neveritshme nga tifozët e Francës në internet pasuan pas finales, diçka që lojtarët, Federata Franceze dhe klubet e të prekurve dolën shpejt për ta denoncuar.