Në ditën e 11-të të protestës, ‘lumi’ i njerëzve vijon të vërshojë drejt Kryeministrisë, nga ku kërkohet dorëheqja e Edi Ramës.

Ashtu sikurse në ditët e tjera, edhe në këtë ditë nuk kanë munguar idetë brilante të sjella në këtë protestë jo vetëm përmes pankartave, por tashmë me ‘pije të re’.

Një vajzë në protestë ka marrë në dorë një kanaçe, të cilën e ka emëruar “Ramingo ik”, me një flamengo rozë.

Me këtë pije, e reja ka zgjedhur të ironizojë kryeministrin Edi Rama dhe komentet e tij për influenceret, që kanë reaguar pro protestave, zanafilla e së cilës ka lindur me Zvërnecin.

“Kjo është pija më e re që ne influenceret kemi marrë për të reklamuar dhe quhet ‘Ramingo ik”.

Rama në daljet e tij publike tha se influencerët që kanë dalë në mbështetje të protestës, akuzojnë shtetin për korrupsion, ndërsa vetë ata nuk paguajnë asnjë taksë.

Kjo pije e re e sjellë sot në protestë, është një tjetër formë sesi qytetarët po i kërkojnë Edi Ramës të largohet nga drejtimi i qeverisë.