SYRI TV/ Partia e Lirisë tryezë për shëndetësinë, Blushi: Të bllokojmë koncesionet korruptive

Partia e Lirisë Propozon Reforma për Shëndetësinë: Rritja e Buxhetit dhe Rimbursimi i Ilaçeve për Pensionistët

Partia e Lirisë ka paraqitur disa propozime për përmirësimin e sistemit shëndetësor shqiptar. Gjatë një tryeze të organizuar nga kjo forcë politike, u diskutuan problematikat që po përballen shqiptarët në sektorin e shëndetësisë. Sipas Tedi Blushit, premtimi për një shëndetësi falas tashmë ka dështuar, ndërsa Shqipëria është në vendin e fundit në rajon për sa i përket cilësisë së shërbimit shëndetësor.

Në tryezën e organizuar, ku morën pjesë mjekë dhe profesionistë të fushës, Partia e Lirisë ofroi disa propozime për të përmirësuar sistemin shëndetësor. Sipas përfaqësuesve të kësaj partie, Shqipëria duhet të rrisë buxhetin për shëndetësinë në 6% të Prodhimit të Brendshëm Bruto, duke e afruar atë me mesataren e rajonit. Po ashtu, kërkohet dyfishimi i pagave të mjekëve dhe infermierëve për të frenuar largimin e tyre nga vendi.

Një tjetër propozim i rëndësishëm ishte pasurimi i tregut të barnave, me qëllim që të sigurohet një gamë më e gjerë ilaçesh dhe të goditet ashpër kontrabanda, duke krijuar mundësi për rikthimin e kompanive farmaceutike ndërkombëtare në Shqipëri. Po ashtu, Partia e Lirisë kërkon bllokimin e të gjitha koncesioneve korruptive që ndikojnë në sistemin shëndetësor dhe abuzojnë me taksat e shqiptarëve.

Më tej, për të siguruar shërbim më të mirë për qytetarët, kërkohet realizimi i autonomisë për shërbimin spitalor, e cila do të ishte rruga e vetme për një sistem shëndetësor efikas. Partia e Lirisë propozon gjithashtu mbulimin financiar të të gjitha barnave për pensionistët dhe të gjitha shërbimeve mjekësore dhe infermierisë për ta, përfshirë edhe reabilitimin dhe fizioterapinë pa pagesë.

Në të njëjtën linjë me Blushin, ishin edhe Erisa Xhixho dhe Petrit Vasili, të cilët theksuan se korrupsioni dhe keqmenaxhimi i qeverisë kanë sjellë përkeqësim të mëtejshëm të shërbimeve shëndetësore për qytetarët.