Deputeti i Partisë Demokratike, Belind Këlliçi, i ftuar në emisionin ‘Task Force’ në SYRI TV, ka folur për problemet e drejtësisë dhe zvarritjen e çështjeve gjyqësore për qytetarët shqiptarë, duke theksuar se kur bëhet fjalë për njerëz pranë pushtetit dhe qeverisë Rama, gjithçka ndodh me shpejtësi të pazakontë.

Gjatë bisedës, Këlliçi solli si shembull rastin e babait të ish-kryetares së Këshillit të Lartë Gjyqësor, Naureda Llagami, i cili, sipas tij, për vetëm 3 vite e gjysmë ka marrë një vendim gjyqësor që e kompenson me 3 milionë dollarë, së bashku me disa bashkëpronarë të tjerë të një prone në Tiranë me sipërfaqe 9500 metra katrorë tokë.

 ‘Nëse një shqiptari të zakonshëm i duhen 15.8 deri në 20 vite afat kohor për të ezauruar të tre shkallët e gjyqësorit, unë kam shtruar një pyetje; se si ka mundësi që gjatë investigimit të një rasti të dyshuar korruptiv të Këshillit të Ministrave që ka të bëjë me disa godina publike, ku përfitues fundor është shtetasi leçian Karlo Bollino, si ka mundësi që kemi hasur një procedurë gjyqësore, ku palë është babai i ish-kryetares së KLGJ-së, Naureda Llagami dhe t’ju jap afatet,’ tha Këlliçi.

‘Zotëria në fjalë është një nga bashkëpronarët e një trualli publik prej 9500 metrash katror. Në korrik të 2020 kanë depozituar një padi në gjykatë. Është shprehur gjykata në korrik të 2021 – 1 vit shkalla e parë. Është bërë ankimimi në Gjykatë e Apelit Administrativ, është lënë në fuqi vendimi për kompensim në shkurt të 2023 për 3 milionë dollarë.

Është ankimuar nga Agjencia e Trajtimit të Pronave vendimi në Gjykatën e Lartë dhe gjykata e Lartë në shtator 2024 ka lënë në fuqi vendimin për kompensimin me 3 milionë dollarë për babain e ish-kryetares së KLGJ,’ theksoi deputeti demokrat.

Sipas tij, vendimi është marrë nga një trupë vendimmarrëse e përbërë nga kryetari i Gjykatës së Lartë, Sokol Sadushi, dhe dy anëtarë të tjerë.

‘Pyetja është fare e thjeshtë dhe legjitime; a mund të shpjegohet se cila ka qenë arsyeja e veçantë që nëse një shqiptari të zakonshëm i duhen 20 vite për një vendim, çuditërisht babait të kryetares së Këshillit të Lartë Gjyqësor i janë dashur vetëm 3 vite e gjysmë për të marrë një vendim dhe që të kompensohet,’ deklaroi ndër të tjera deputeti Belind Këlliçi në SYRI TV.