‘Josif Budo ra për liri’, motra e të ndjerit: Kavaja sot kërkon fundin e një tjetër regjimi, largojeni diktatorin

Kryetari i Partisë Demokratike, Sali Berisha, ka zhvilluar ditën e sotme një vizitë në qytetin e Kavajës, me rastin e 35-vjetorit të rënies së Dëshmorit të Parë të Demokracisë, Josif Budo.

Në nder të tij, prezente në këtë përurimin e shtatores së Josif Budës, ishte dhe e motra (Rudina Budo) e cila gjatë fjalës së saj ka kujtuar me emocion natën e 10 korrikut, kur Josifi dha jetën për idealin e lirisë.

Ajo vuri në dukje se edhe pse Josifi u qëllua me armë nga regjimi, ai nuk u tremb dhe as u tërhoq nga ëndrrat për një Shqipëri të lirë.

Sipas saj, ai përfaqësonte zërin dhe kurajën e rinisë kavajase, e cila nuk pranoi të nëpërkëmbet nga diktatura.

"Jam falënderuese që Kavaja i ra fuqisë gjakut të Josifit që të triumfonte, e duam Shqipërinë me ëndrrat e Josifit. Edhe një herë tjetër, Kavaja merr forcë e largon dhe një herë tjetër atë që është diktator"- u shpreh ajo.

Deklarata e saj:

"Ju përshëndes të gjithëve dhe mirë se keni ardhur.

Faleminderit të gjithëve që keni ardhur sot për të mbështetur veprën e Josifit që përfaqëson gjithë rininë e Kavajës në ato vite.

Jam pjesëmarrëse e asaj nate, e 10 korrikut që më kujtohet se si në këtë orë, Josifi ishte plot ëndrra e ide për lirinë, me ide për të mposhtur njollën e komunizmit që kishte vite që mbante rininë e mposhtur.

Në darkë, në orën 10, stampistët 'u turrën' si qen për t’ia hequr këtë ëndërr rinisë së Kavajës, por Josifi nuk u tremb. Nuk u tremb nga inati i tyre, nuk u tremb nga ideja që të trembte rininë apo të heshtte rinia e Kavajës.

Ato 3 plumba nuk e rrëzuan Josifin, por të nesërmen kavajasit i thanë Josifit: ‘Ne jemi me ty, ne do t’i çojmë përpara idealet e tua dhe do e mposhtim një herë e përgjithmonë diktaturën nga Kavaja e nga e gjithë Shqipëria.’

Jam falënderuese që Kavaja i ra fuqisë gjakut të Josifit që të triumfonte, e duam Shqipërinë me ëndrrat e Josifit, dinjitetin e bashkimin dhe Kavaja është shembull i një populli të bashkuar e një ideali të vetëm: ‘Vetëm në Liri, ka siguri. Nëse nuk jemi të lirë, nuk ka liri për të rinjtë.’

Edhe një herë tjetër, Kavaja merr forcë e largojeni edhe një herë tjetër atë që është diktator!