Rrjeti më i madh amerikan Fox News ka shkruar se ish-agjenti i lartë i FBI-së, Charles McGonigal, u dënua sepse fshehu lidhjet korruptive me qeverinë shqiptare. Pas shpalljes së vendimit të gjykatës, Fox News thekson se Mcgonigal  përparonte interesat shqiptare në Shtetet e Bashkuara të Amerikës pasi kërkoi dhe mori afërsisht 225 mijë dollarë në vitin 2017, nga një person që kishte punuar për një agjenci të inteligjencës shqiptare.

Nga SYRI TV

Gjiganti amerikan Fox News i ka bërë jehonë vendimit të Gjykatës Federale në Washington e cila dënoi me burgim ish-agjentin e lartë të FBI-së, Charles McGonigal, për dosjen shqiptare. Sipas rrjetit më të madh amerikan, McGonigal u dënua sepse fshehu lidhjet korruptive me qeverinë shqiptare.

‘Një ish-zyrtar i lartë i kundërzbulimit të FBI-së u dënua të premten me më shumë se dy vjet burg për marrjen e qindra mijëra dollarëve në para të thata nga një biznesmen me lidhje me qeverinë shqiptare- dhe për përpjekjet për të fshehur marrëdhëniet e tyre financiare korruptive’, shkruan FoxNews.

Charles McGonigal, 55 vjeç, mbikëqyri operacionet e sigurisë kombëtare për FBI-në në Nju Jork për gati dy vjet përpara se të dilte në pension në vitin 2018. Ai dukej se përparonte interesat shqiptare në SHBA pasi kërkoi dhe mori afërsisht 225 mijë dollarë në vitin 2017 nga një njeri që kishte punuar për një agjenci të inteligjencës shqiptare, thanë prokurorët.

Gjykatësja amerikane e qarkut, Colleen Kollar-Kotelly e dënoi McGonigal me dy vjet e katër muaj burg për çështjen e sjellë në Uashington. Ajo urdhëroi që ai të shërbejë këtë dënim mbi dënimin prej 50 muajsh burg për një çështje të veçantë në Nju Jork, kështu që ai do të përballet me gjashtë vjet e gjashtë muaj burg kur të paraqitet në burg muajin që vjen,.

Gjykatësja i tha se ai kishte humbur kompasin moral dhe se në fund të karrierës, ai kishte mbajtur një nga postet më të larta të sigurisë kombëtare në qeverisjen federale.

Prokurorët federalë thanë se në lojë ishin licencat për fusha nafte në Shqipëri. I implikuar sipas tyre është edhe ish-ministri i energjetikës në Shqipëri, që kishte interesa financiare në këtë çështje.