Historiani i njohur zviceran, Oliver Jens Schmitt ka dhënë një intervistë për mediat e vendit të tij, ku sqaron situatën me Kosovës dhe Serbisë.

Duke komentuar aktin terrorist në veri të Kosovës, ai tha se Perëndimi, veçanërisht SHBA, po e dëmtojnë Kosovën me qasjen e tyre.

“Kosova veriore është një qendër e rëndësishme për krimin e organizuar. Në fakt, nuk ka forcë policore në rajon. Krimi i organizuar ka interes që t'i ndalojnë qasjen policisë së Kosovës. Çdo veprim i policisë përshkruhet si dhunë e supozuar etnike. Incidenti i lartpërmendur i tregoi të gjithë botës se sa ngushtë janë të lidhura krimi i organizuar dhe dhuna politike. U bë gjithashtu e qartë se sa ngushtë janë ndërthurur këto grupe të aktorëve politikë kriminalë me qeverinë në Beograd”, tha historiani zviceran.

“Megjithatë, deri në aktet e dhunës nga ekstremistët serbë në shtator 2023, qeveria e Kosovës ishte mjaft e izoluar, sepse qeveria serbe ka një lidhje të mirë me SHBA-në falë dërgesave të municioneve në Ukrainë që janë të rëndësishme për përpjekjet e luftës. Aleksandër Vuçiç, i cili gjithashtu është i prirur ideologjikisht drejt Rusisë, nuk është një demokrat, por një sundimtar autoritar që vepron brutalisht nga brenda. Fakti që Perëndimi po i afrohet, është gjithashtu i rrezikshëm sepse Kosova është e vetmja demokraci funksionale në rajon,” theksoi Schmitt.

"Ndërsa njerëzit në Ukrainë thonë me të drejtë se vlerat perëndimore si demokracia po mbrohen, Perëndimi, veçanërisht SHBA-të, po e dëmtojnë Kosovën duke mbajtur qëndrim në favor të Vuçiçit, ku këto vlera respektohen më shumë se në Serbi,” shtoi ai.

“Sot Kosova ka një peizazh partiak të gjallë. Në të njëjtën kohë, vende si Serbia dhe Shqipëria kanë mbetur prapa në zhvillimin e demokracisë. Aty ose zhvillohen zgjedhje jo të lira, ose opozita nuk i pranon rezultatet dhe bllokon parlamentin, të paktën përkohësisht,” tha historiani.