Lideri i opozitës Sali Berisha e akuzoi Kryeministrin Edi Rama në veçanti për dëmin që po i shkakton interesave të vendit, arrestimi dhe burgosja e kryebashkiakut të zgjedhur të Himarës, Fredit . "Prevalon interesat mafioze të tij mbi interesat e vendit,  - tha Berisha, në mbledhjen e Grupit parlamentar të PD-së.

"Nuk u prit në Athinë, - vuri në dukje kreu demokrat. -  Po sigurisht sepse samiti ishte për vlerat europiane që duhet të ndajnë vendet e Ballkanit, ishte për një deklaratë historike e cila përbën dokumentin legal të prespektivës europiane të vendeve të rajonit, me kusht që ata t'iu përmbahen vlerave europiane.

Ky shkelmon vlerat europiane dhe pastaj thotë se Policia dhe drejtësia ime e pavarur, më thonë këto gjëra!!!

Mban në burg Fredi Belerin, absolutisht si të burgosur politik, vetëm e vetëm që të skadojë 90 ditëshi i afatit që ai të mos betohet si kryebashkiak i Himarës. 

Iu them atyre që besuan se të besosh nacionalizmin e Edi Ramës është si të besosh turpin. Dhe kini kujdes atë që ka thënë Niçja; se ky nacionalizëm është streha e fundit e horrave. 

Po ç’ka të bëjë me nacionalizmin, respektimi i ligjeve tona?! Përkundrazi, ka të bëjë me nacionalizmin qytetar, shqiptar sepse ti je njeri i ligjit, i Kushtetutës. Se ti për një shqiptar ke shkuar në burg dhe ke dhënë mandatet dhe betimet, sepse ligji, po nuk qe i dënuar nuk e ndalon. Shumë thjesht, një parim shekullor i prezumimit të pafajësisë.

Kurse këtij që do t'ia marrësh me çdo kusht mandatin për pronat e tua, të klanit tënd mafioz dhe klaneve të tjera mafioze, këtij i thua se me thotë Policia dhe drejtësia e pavarur që nuk mund të betohet!!! Ka gjë më të turpshm?! 

Enver Hoxha i bënte këto, por një drejtues i një vendi të lirë nuk e bën dot kurrë këtë. E bën vetëm për interesa të tij mafioze dhe i çon marrëdheniet me një fqinj, i cili për hir të së vërtetës duhet të themi këtu, pavarësisht  se ka pasur probleme në marrëdhëniet tona, por në tërësi ka predominuar, bashkëpunimi, miqësia.

Greqia në asnjë rast që nga vitet ’90 e gjer dje asnjëherë nuk është bërë pengesë në proceset e integrimit evropian, euroatlantik të Shqipërisë.  Mund të ketë patur rezervat e veta, mund të ketë patur hezitimet, por nuk i ka lejuar vetes kurrë, asnjëherë. Tani të kërkon të zbatosh ligjin tënd dhe i thua "po më ndërhyn!". Çfarë po ndërhyn?! 

Prevalon interesat mafioze të tij mbi interesat e vendit, mbi idealet demokratike të shqiptarëve dhe natyrisht e çon tjetrin drejt atyre qëndrimeve, që nuk i kanë pasur ndonjëherë.

Me fqinjët gjithmonë krijohen probleme, por problemet zgjidhen dhe nuk kanë shkuar ndonjëherë në atë që të na pengojnë apo lobojnë kundër, cilido që ka qenë në pushtet. Por tani, me prevalimin e interesave mafioze të tij, do të na vijnë."