Admir Sinamati, kandidati i opozitës, i koalicionit ‘Bashkë Fitojmë’ për bashkinë e Kukësit, gjatë një interviste në ‘A show’ me Adi Krastën në SYRI TV, ka folur rreth problematikave që shqetësojnë këtë rajon.

Në hyrje të intervistës së tij, Sinamati u shpreh se e ka peshuar mirë vendimin për të kandiduar në Kukës, duke cituar edhe një thënie të zonës së Lulës.

‘Ka një postulat në Kukës, që ‘burri i mirë, kurrë nuk ngutet, as prej frike, as prej tute’. Të jesh i butë, i qetë, i urtë, i matur, është cilësi, është veti e Lumës në përgjithësi, lumjanëve në veçanti sepse i ka sprovuar jeta, në beteja të ndryshme, si në kushtet ku ka jetuar në ato treva si në kushte natyrore dhe njerëzore.

Populli i Kukësit ka gjetur vetveten, sheh vetveten dhe do të gjejë vetveten’, tha Sinamati.

Duke folur për fenomenin e shpopullimit, Sinamati u shpreh se një nga shkaqet kryesore të largimit të të rinjve nga Kukësi, është diskriminimi i bërë nga qeveria këtij rajoni. Ndërsa nëse mund të ndalet ky fenomen, ai tha se është diçka e mundshme’.

‘Absolutisht e mundshme, e realizueshme, së paku të ndalet shpopullimi. Ka disa arsye për të cilat ka ndodhur ky fenomen, trishtues, tipik shpopullues. Arsyeja kryesore është distancimi i qeverisë, ose largimi i qeverisë nga Kukësi. Distancimi nga Kukësi, falë mosinteresimit ose falë një pengese, një tipari diskriminues rajonal. E them me bindje, vërtetësi, sepse faktet flasin vetë.

Kukësi doli nga izolimi gjeografik në vitin 2009, kur u hap Rruga e Kombit, nyja kryesore lidhëse Shqipëri-Kosovë, nga e cila përfitoi edhe rajoni i Kukësit. Vetëm pak vite kuksianët e shijuan këtë vepër madhore dhe menjëherë pas rikthimit të sektit të rilindjes në pushtet, kuksianëve i’u vu një tra, një portë hekuri. Pavarësisht reagimit, revoltës kuksiane, përsëri u gjetën mekanizma që ajo portë të jetë e mbyllur, qoftë edhe simbolike.

Pastaj interesimi i qeverisë me projekte konkrete, punësimi, projekte mbështetëse për çështjet sociale. Mjafton të thuhet një fakt se, menjëherë me kthimin e të majtës në pushtet, në Kukës janë larguar nga skema e ndihmës ekonomike 20 mijë persona.

Tani në Kukës nuk ka asnjë projekt të mirëfilltë punësimi. Gjithçka që është bërë në rajonin e Kukësit në përgjithësi, janë bërë disa investime me bazë elektorale dhe përfituese korruptive.

Pretendohet se në Kukës, e kam dëgjuar nga rivali, ish-kryetari i bashkisë Kukës, se qeveria ka investuar rreth 100 mln euro. Paramendoni nëse këto para vërtetë do të ishin lëvruar në rajonin e Kukësit, se çfarë baze financiare për ndërtimin e një jete normale do të ishin. Por e vërteta është ndryshe dhe largimi i të rinjve të Kukësit nga vendlindja është vetëm falë këtij projekti diskriminues ndaj kësaj treve’, tha në SYRI TV, Admir Sinamati, kandidat për Bashkinë e Kukësit.