Lideri i opozitës Sali Berisha denoncoi aferat korruptive të qeverisë dhe kryeministrit Edi Rama. 

Këtë pasdite Berisha zhvilloi një takim me anëtarë të FRPD, nga ku shprehu se pasuritë që duhet të shndërroheshin në kushte më të mira jetese për shqiptarët, zhvaten nga qeveritarët. 

Berisha tha se skenari është i qartë, me lekët e korrupsionit dhe eurot që vijnë nga narko-trafiku, përdoren për të vjedhur votat. 

"Porti i Durrësit, përfundon i tëri në pronësi të një grupi kriminal. Në vend se këto pasuri të shndërrohen në kushte jete për ju dhe shqiptarët, këto shndërrohen në mallkim, dëshpërim, për të paguar mediat që të mashtrojnë qytetarët shqiptarë nga mëngjesi deri në darkë. Shndërrohen për të vendosur këtu diktaturën e mashtrimit, të realivizmit, injorimit të të vërtetave.  

Këto shndërrohen së bashku me narko eurot në mjete për vjedhjen e votës, rrëmbimin e votës. Shqiptarët nuk kanë shpresë sot, sepse vota u vidhet, pasuritë u vidhen, buxheti u vidhet. Ua them unë ju, sipas KLSH janë vjedhur 122 miliardë lekë. 97 miliardë është fondi i pagave në Shqipëri. Ç’ka do të thotë, vetëm me këto mund të dyfishoheshin rrogat e shqiptarëve. 

Përkundrazi udhëton me avion me dhomë gjumi, shpenzon 22 mln euro në udhëtime. Udhëton me vetura 500 mijë eurosh dhe thotë ma ka blerë partia, se partia e tij prodhon lekë. Kryeson vetëm 19 mbledhje nga 48 mbledhje të qeverisë. Nuk ekziston asgjë tjetër për të, veç se pasurimi i tij i papërmbajtur. Po pse Alda u mbush në të gjitha anët me paratë e vjedhura. Sepse ministri i saj, nëse ajo mbush kasafortat, ai mbush dhomat, Edi Rama mbush tunelet dhe kontot kudo që i ka. Prandaj ikin shqiptarët", u shpreh Berisha.