Kryeministri Edi Rama ka qenë këtë të shtunë në qytetin e Vlorës, si gjithmonë i shoqëruar nga një numër i madh truprojash dhe forcash policore.

Me këtë rast, ai ka inspektuar edhe punimet infrastrukturore për projektin që lidh rrugën transballkanike me portin, si dhe punimet e një ure në Lumin e Vlorës. Të dy inspektimet e Ramës, janë shoqëruar me incidente dhe debate me banorë.

Një numër qytetarësh që janë prekur nga projekti për rrugën transballkanike, kanë shfrytëzuar rastin dhe i kanë ngritur shqetësimin lidhur me shembjet e shtëpive të tyre.
Rama ka ndaluar, por i ka “sqaruar” me arrogancë duke ngritur zërin.

“Kjo punë do të bëhet. Kush e ka me dokumente do të shpronësohet sipas ligjit. Kush e ka pa dokumente do të marrë bonus qiraje dhe do të strehohet për 3 vjet me pagesë nga bashkia. Më pas, bashkia ka programin e strehimit social, kujt i takon do të marrë apartament”, sqaroi ai banorët.

Gjithashtu gjatë një inspektimi të punimeve të një ure në Lumin e Vlorës, Edi Rama, u revoltua kur një përfaqësues i pushtetit vendor i përmendi popullin e Peshkëpisë dhe Selenicës të cilët këmbëngulin për ndërtimin e rrugës, e cila në mënyrë të “çuditshme” edhe pse ishte përcaktuar fondi, u anulua së fundmi.

“Thuaji atyre të Peshkëpisë dhe Selenicës që nuk kanë gojë të flasin”, u shpreh Rama me tone të larta. Ai shtoi se aq sa ka bërë kjo qeveri për ta, nuk e ka bërë askush. "Dëgjojnë atë Leskon ata dhe Lulin”, u hakërrye Rama.