FOTO-VIDEO/ Doris Pack i ribashkohet protestës në mbrojtje të Teatrit Kombëtar

Ish-Eurodeputeteja gjermane, Doris Pack, ka qenë ditën e sotme e pranishme në protestën e Aleancës për Mbrojtjen e Teatrit.

Politikania e njohur europiane, e cila ka dalë disa herë në mbështetje të kauzës së Teatrit, vizitoi edhe ekspozitën e artistit Avni Delvina në hollin kryesor të Teatrit Kombëtar.

Në një postim të mëhershëm në Facebook, Pack i quan aktivistët e Teatrit Kombëtar si "protestuesit e guximshëm".

Pack ndodhet në Shqipëri në kuadër të një seminari që Instituti Robert Schumann po organizon me të rinjtë.

Në një postim në Facebook gjatë pasdites së sotme, Aleanca për Mbrojtjen e Teatrit apelonte te qytetarët që ti dalin në mbrojtje godinës, pasi sipas informacioneve të tyre, në datat 16-17 nëntor, qeveria pritet të mësyjë. 

"Sipas informacioneve paraprake, qeveria e Edi Ramës dhe bashkia e minionit të tij Erion Veliaj kanë synim të sulmojnë dhe shembin Teatrin Kombëtar.

Me pretekstin e aktiviteteve që do të zhvillohen më 17 nëntor në Tiranë, do të bëhet bllokimi i rrugës dhe i zonës rreth Teatrit.

Me urgjencën që e kërkon ky rast ju bëjmë thirrje të gjithë juve që e lexoni këtë thirrje, të na ndihmoni që sëbashku ta mbrojmë deri në fund Teatrin si qytetarë të lirë të këtij vendi", apelon AMT.