Nis procesi ndaj bosit shqiptar të kokainës/ Gjithçka u zbardh pas zbulimit të 12 mijë litrave mbetje droge

Nga Mark Eeckhaut, STANDAARD

Gjithçka filloi me zbulimin e 12.000 litrave mbetje droge.

Më 24 dhjetor 2020, natën e Krishtlindjes, policia belge mori një telefonatë nga kolegët holandezë. Një shofer holandez kamioni ishte në Temse dhe Beveren për të marrë një ngarkesë, por ajo ishte e dyshimtë. Kur u kthye në Holandë dhe kontrolloi çfarë kishte në kamionin e tij, rezultoi se bëhej fjalë për një ngarkesë prej 12.000 litra mbetje droge.

Në të njëjtën kohë, policia belge mori një njoftim nga Kolumbia se aty ishte zbuluar 357 kilogram kokainë brenda një ngarkese oksidi hekuri që ishte destinuar për një kontraktues në Beveren. Jo rastësisht, bëhej fjalë për të njëjtin adresë nga ku ishte nisur mbetja e drogës natën Krishtlindjes. Kështu nisi hetimi.

Suksesi i madh erdhi në mars 2021, pas çmontimit të Sky ECC, shërbimit të mesazheve të botës së nëndheshme. Atëherë u zbulua se boshnjaku i Antverpenit, Sani “Shade” A.M., ishte ai që mbante gjërat nën kontroll në këtë rrjet. A.M. është një figurë e njohur e klanit Skaljari në Ballkan. Ai është një nga të mëdhenjtë në biznesin e kokainës dhe vetë organizonte transportet, nga burimi në Amerikën e Jugut deri te klienti në Evropë.

Përzierjet e kokainës

Dora e tij e djathtë ishte Ermir “Cinco” N., një shqiptar nga Antverpeni që gjithashtu është figurë kryesore në tregtinë e kokainës. Ata krijuan disa kompani të rreme për t’i dhënë trafikut të kokainës një pamje të zakonshme biznesi. Ajo që e veçonte organizatën e tyre nga të tjerët ishte përdorimi i mezclado-ve ose përzierjeve: kokaina përzihej në roofing (material për tavan), çimento, pigmente sintetike dhe madje edhe ton. Kjo zvogëlonte shumë mundësinë e zbulimit. Por disavantazhi ishte se kokaina, kur mbërrinte në Evropë, duhej të nxirrej përsëri nga këto produkte në atë që quhet fabrika e pastrimit të kokainës (nga ku vjen edhe emri i procesit: Kookwas). Kjo kërkonte shumë kimikate dhe krijonte shumë mbetje.

Anëtarët e bandës duhej të hiqnin qafe mijëra litra kimikatesh. Kur në dhjetor 2020 mbyllën fabrikën e pastrimit të kokainës në Charleroi, ata transportuan njëzet ton mbetje në Melsele. “Dy fundjava dhe gjithçka zhduket,” shkroi anëtari i bandës Ronaldo V.M. në një mesazh në Sky ECC tek Ermir “Cinco” N. “Ai tipi i Besix-stort e di dhe i fut të gjitha me buldozer në gropë”.

Nuk është provuar, por prokurori dyshon se mbetjet e lëngshme janë përzier fillimisht me gurë të thyer dhe pastaj janë hedhur nga anëtarët e bandës në punimet e Oosterweel. Pjesa tjetër e mbetjeve do të përpunohej në Holandë, por një shofer i kujdesshëm u bë pengesë. Si A.M., ashtu edhe “Cinco” nuk do të jenë të pranishëm në gjyqin e tyre. Ata janë në arrati. Kokaina e kontrabanduar besohet të jetë mbi dhjetë ton.

Do të shihet nëse ky proces, ndryshe nga proceset Samba dhe Costa, do të kalojë pa incidente. Nuk është e sigurt, sepse në procesin e Kookwas, të akuzuarit mbrohen nga të njëjtët avokatë si në proceset Samba dhe Costa. Ky i fundit mund të rifillojë më 8 tetor, pasi edhe kërkesa e dytë për përjashtim, nga i dyshuari kryesor Geert Frisson, u refuzua. Ai gjithsesi mund të bëjë apel në kasacion.