Gazeta më e madhe britanike, Daily Mail, publikoi pamjet e arrestimit të Dritan Rexhepit nga policia turke.
Gazeta shkruan se Dritan Rexhepi u arrestua gjatë një operacioni dramatik, ndërkohë që emri i tij ishte në listën e Interpolit me kartelë të kuqe për trafik droge, vrasje dhe krime të tjera.
Baroni ndërkombëtar i krimit është lideri i të parit kartel shqiptar të kokainës, të quajtur Kompania Bello.
Sipas Daily Mail, ai ka qenë edhe në listën e personave më të kërkuar të policisë britanike për shkak të lidhjeve të ngushta me Anglinë.
Rexhepi trafikonte kokainë nga Amerika e Jugut drejt Europës dhe ka qenë personazh i një dokumentari të Daily Mail, të quajtur ‘Narkosit shqiptarë’.
Zyrtarët turq thanë se Rexhepi, i njohur me nofkën ‘Mbreti i Kokainës’ kishte hyrë në vend përmes aeroportit të Stambollit dhe ishte regjistruar me emrin Benjamin Omar Perez Garcia.
Gjatë arrestimit, atij iu gjet edhe një revolver, ndërsa pamjet e ndalimit bënë xhiron e rrjetit.
Gazeta shkruan se sipas investigimit të saj, Rexhepi ka përmbytur me kokainë edhe rrugët e Anglisë. Ai njihej si një bos i pamëshirshëm i trafikut të drogës.
Sasitë e mëdha të kokainës që ai solli në Angli, bënë që droga të shpërndahej në vend më shpejt sesa porosia për një picë.
Rexhepi u lirua në mënyrë kontroverse nga burgu në Ekuador dy vjet më parë.
© SYRI.net