50 gram është sasia e eksplozivit të vendosur në mjetin e kreut të degës së Partisë Demokratike në Bashkinë e Vaut të Dejës, Benard Ndrecës.

Sipas TV Klan, ky është përfundimi i arritur nga forcat xhenio pas ekspertimit të mjetit.

Në lidhje me ngjarjen e rëndë të një dite më parë, në Policinë e Shkodrës janë shoqëruar 6 persona, ndërkohë që ende nuk ka persona të ndaluar për shpërthimin me eksploziv në makinën e Ndrecës.

Grupi i ekspertizës po analizon në detaje mjetin e kreut të PD-së në Vaun e Dejës, Ndrecës, në mënyrë që të arrihen të gjenden gjurmë të autorëve në mjet gjatë momentit të vendosjes së lëndës eksplozive edhe pse ka pak mundësi që ajo të ndodhë për shkak të shpërthimit të fuqishëm.

Grupi hetimor ka sekuestruar edhe kamera të tjera të sigurisë në zonë për të parë lëvizjet e autorëve, pasi janë larguar nga banesa e Ndrecës.